Грција: Претепан екс министерот за финансии Варуфакис

Нападот врз поранешниот грчки министер за финансии Јанис Варуфакис се случил вчеравечер (10.03) во Атина. Левичарскиот опозициски политичар бил виден во ресторан од група од околу 20 луѓе, кои прво го навредувале од улица.

Потоа Варуфакис излегол пред вратата на ресторанот, каде што бил нападнат од повеќе маскирани лица. Тие го фрлиле на земја, го шутирале и удирале по лицето. Екс министерот е префрлен во болница со скршен нос.

Варуфакис на Твитер се заблагодари за солидарноста која што му била изразена по нападот. Тој ги негира информациите дека напаѓачите биле од автономната сцена, анархисти или левичари. 

Варуфакис смета дека поверојатно е да се работи за платени тепачи, кои го обвинувале дека ја „продал“ Грција на странците во текот на должничката криза во 2015 година, додека тој беше на функцијата министер за финансии.

Партијата на Варуфакис, Мера25, за нападот вели дека е „фашистички“. Економистот Јанис Варуфакис денес е пратеник во парламентот.