Големи руски напади на Украина на Божик

Русија на првиот ден од Божик ја нападна Украина со беспилотни летала и ракети. Украинската воена авијација извести за ракетни напади врз регионите Харков, Дњепар и Полтава. Украинците рано утрото побараа засолниште во станиците на метрото. Меѓу другото, од Црното Море беа истрелани руски крстосувачки ракети Калибр.

Украинските извори на енергија беа нападнати со околу 70 ракети, вклучително и балистички ракети и повеќе од 100 борбени беспилотни летала, напиша на платформата Х украинскиот претседател Володимир Зеленски.

„Путин свесно одлучи да нападне на Божиќ. Што може да биде понечовечно?“ напиша тој. Украинската армија, според Зеленски, успеала да собори најмалку 50 ракети и значителен број беспилотни летала.

Штрајкови и прекини на струја дошло во повеќе региони во земјата, соопшти Зеленски. Цел на   руските напади било снабдувањето со енергија.

Според украинскиот снабдувач со енергија ДТЕК, руските трупи нападнале неколку електрани. Компанијата на Телеграм објави дека има сериозна штета. „Оваа година ова е 13-ти голем напад врз украинскиот енергетски сектор и 10-ти голем напад врз енергетските постројки на компанијата.“

Нарушен романскиот воздушен простор?

Според информациите од Киев, за време на нападите врз Украина, ракета го нарушила воздушниот простор на ЕУ и НАТО членката Романија и нејзината соседна земја Молдавија. Руската ракета прелета над Романија и Молдавија, соопшти украинскиот министер за надворешни работи Андриј Сибига на платформата X. Ова, според него, јасно покажува дека Русија „не ѝ се заканува само на Украина“.

Но, романското Министерство за одбрана соопшти дека не е забележано нарушување на воздушниот простор. Податоците дадени од романската контрола на летање, како што се вели, „не потврдија“ дека проектил го нарушил романскиот воздушен простор.