Генерал Хоџис: Украинците ќе се обидат да го повратат Крим

Одлучувачката битка за Украина ќе се води во Крим, вели американскиот генерал Бен Хоџис во интервју за ДВ. Тој очекува украинската контраофанзива да биде насочена токму кон полуостровот кој беше анектиран од Русија во 2014 година.

„Крим е решавачки терен. Можете да ги убиете сите руски војници во радиус од 200 километри од Бахмут, но тоа нема да го промени стратешкото опкружување“, вели Хоџис.

„Но, доколку го ослободите Крим, тоа менува сѐ. Затоа, контраофанзивата ќе биде насочена кон ослободување на Крим, а потоа и на остатокот на Донбас, што ќе дојде подоцна“, смета генералот. 

Хоџис оценува дека одлуката на Украина да продолжи да се бори за градот Бахмут, и покрај тешката позиција, е исправна.

„Битката за Бахмут е многу скапа, но и многу неопходна. Генералштабот успеа да ги сопре руските трупи во Бахмут, да ги искрвари, и да ги натера да потрошат многу ресурси без притоа Украина да мора да ги искористи своите оклопни сили во Бахмут. Тие ќе им бидат потребни кога ќе ја започнат контраофанзивата“. 

Американскиот генерал смета дека украинската армија е добро подготвена за следните предизвици и очекува да им зададат одлучувачки удар на руските трупи кои, вели тој, се „на точка на прекршување“. 

„Особено нивниот логистички систем, каде гледаме многу омраза и ривалство меѓу лидерите на руска страна. Доколку овој напад започне да добива на сила и навлезе десетици километри низ руските одбрани, мислам дека тоа ќе има психолошки ефект и врз другите руски трупи, како и врз Кремљ“, проценува Хоџис.