Фотографии на денот

Европските фудбалски кралеви со кралот на Шпанија во екстаза по освојувањето на пехарот на ЕУРО 2024! Шпанската фудбалска репрезентација е шампион рекордер - на европскиот трон седнува по четврти пат - по 1964, 2008 И 2012 година. Победата над Англија од 2:1 во финалето на европското првенство беше заслужена, оценуваат експертите за најдобриот тим на турнирот.

Герет Саутгејт прво најгласно што може ја покажа своја радост и олеснување по полуфиналниот натпревар против Холандија на ЕУРО 2024, а потоа пред новинарите се презентираше опуштено. По големите критики, па дури и фрлање чаши од своите навивачи, селекторот на Англија почувствува малку задоволство во Дортмунд. Англија е повторно во финалето на едно ЕП и има шанса за прв триумф по 1966 година.

Голот на Ламин Јамал на полуфиналниот натпревар од европското фудбалско првенство помеѓу Шпанија и Франција (2:1) е гол за историја на ЕП. Шеснаесетгодишниот Јамал стана најмлад стрелец во историјата на европските првенства. Својот 17-ти роденден ќе го прослави еден ден пред финалето во Берлин в недела. Вели дека има само една желба: „Ништо, само победа, победа, победа!“.

Рускиот претседател Владимир Путин (д.) во разговор со својот гостин од Индија, премиерот Нарендра Моди додека се возат во електромобил за време на неформалната средба во резиденцијата Ново Огарјово, кај Москва. Путин сака да му биде перфектен домаќин на индискиот премиер и го покани на чај во својата резиденција. Притоа, како што јави агенцијата Тас, тие неофицијално разговарале на различни теми.

Она што на прв поглед изгледа идилично е всушност катастрофа. Монсунските дождови предизвикаа поплави и лизгање на земјиштето во индиската држава Асам. Најмалку 16 лица загинаа. Нивото на водата расте од чес во час и стотици илјади луѓе мора да ги напуштат своите домови, кои се веќе под вода. Поплавите во Асам погодија повеќе од 11 милиони луѓе во 23 области.

Жителите на Њујорк можеа да уживаат во спектакуларнни глетки како оваа над Емпајр Стејт Билдинг, благодарение на традиционалниот огномет по повод Денот на независноста. Американското здружение за огномети (АПА) процени дека над 2,4 милијарди долари се потрошени во продажба на пиротехнички средства за огнометите за Денот на независноста во 2024 година.

Толку силен ураган никогаш не е забележан на Атлантикот толку рано во годината. Берил пустоши по Карибите, загрозувајќи ги животите на илјадници луѓе, кои побараа спас во засолништа. Но, има и необјасниви исклучоци. Овој сурфер на брегот на Барбадос им пркосеше на високите бранови предизвикани од ураганот од највисока - петта категорија.

Одгледувањето лаванда во Џаму и Кашмир во последните години станува сè попопуларно поради високиот профит кој може да се оствари. Лавандата е вредна култура поради нејзиното миризливо масло, кое се користи во различни производи, вклучувајќи сапуни, парфеми и козметика. Државата Џаму и Кашмир е многу погодна за одгледување лаванда поради умерената клима и плодната почва.

На историскиот фестивал во германскиот град Шверин, прекрасниот замок во градот беше облеан во светлина во рамките на светлоссното и ласерсско шоу „Звук и светкина". Покрај тоа, на плоштадот пред дворецот одекнуваа мелодии од познати германски музичари и композитори под мотото „Звукот на Германија“. Спектаклот привлече илјадници гледачи.

Новозбраната влада, која ја сочинуваат претставници на коалицијата „Твоја Македонија“ на ВМРО-ДПМНЕ, коалицијата „Вреди“ и движењетп „Знам“ ќе има 20 министерства. Тројца министри ќе бидат без ресори, а премиерот Христијан Мицкоски ќе има пет заменици. Во владата има 20 мажи и три жени, просечната возраст на членовите на Владата е 47 години - најстариот има 66 години, а најмладиот 33 години.

Фудбалската мега ѕвезда Килијан Мбапе, со маска поради скршениот нос, се загрева за натпреварот против Холандија. Иако се загреваше, тој не заигра против Холанѓаните на ЕУРО 2024. Од клупата емоционално ги следеше пропуштените шанси на своите соиграчи. „Да беше одлучувачки натпревар ќе размислев двапати дали ќе го ставам во игра или не“, рече селекторот Дешамп по натпреварот кој заврши 0:0.

Практикување јога во паркот Тианде, во источна Кина, на светскиот ден на јогата, 21 јуни. На меѓународниот ден на јогата не само што се слават значењето и традицијата на јогата и нејзиното позитивно влијание врз здравјето, туку 21 јуни треба да потсетува и на тоа дека јогата ги обединува луѓето ширум светот.

„Вие + Ние = Титула број 4“ - стои на овој плакат кој германските фудбалски навивачи го носеа на натпреварот Германија-Унгарија. Германската фудбалска репрезентација се пласираше предвреме во осминафиналето од Европското првенство. Тимот на селекторот Јулијан Нагелсман во Штутгарт ја победи Унгарија со 2:0. Германците досега го имаат трипати освоено европскиот трофеј - во 1972, 1980 и 1996 година.

Вивиен Џенер носи раскошен шешир на првиот ден од коњската трка Ројал Аскот во Англија. Ројал Аскот е едно од најгламурозните случувања во текот на летото. Оној кој сака да присуствува, мора да се придржува до строги правила на облекување. Носењето шешир е обврска. Притоа, тој мора да има дијаметар од најмалку 10 сантиметри. T.н. фасцинатори, кои се прицврстуваат со помош на шноли, се забранети.

Девојче пред уништена украинска трибина од стадионот Соњачни во Харков, изграден за Европското фудбалско првенство во 2012 година. Трибината е поставена во Минхен во пресрет на натпреварот помеѓу Украина и Романија на ЕУРО 2024. Акцијата има за цел да се обрне внимание на конфликтот кој сѐ уште трае. Стадионот во Харков беше уништен од страна на руските трупи во 2022 година.

Пожарникари се обидуваат да го спречат ширењето на пожарот „Пост Фајер“ во Калифорнија. Пожарот до вчера (16.06) беше раширен на површина од 48 квадратни километри во околината на Лос Анџелес. Причината за пожарот, кој изби во ридовите околу градот, засега е непозната. Против пожарот се борат околу 400 пожарникари, а од регионот се евакуирани околу 1200 луѓе.

Младите фудбалски виртуози во германската репрезентација Флоријан Вирц (десно) и Џамал Мусиала (лево) беа меѓу најдобрите играчи во германски тим во убедливата победа против Шкотска на отворањето на ЕУРО 2024. Беа стрелци на првите два гола на првенството и нивниот извонреден настап не е изненадување за фудбалските познавачи. Мусиала и Вирц би можеле да бидат меѓу ѕвездите на домашното ЕУРО.

Скулптурата „Човек молекула“ дизајнирана од американскиот уметник Џонатан Борофски стои во реката Шпре во Берлин од 1999 година. Таа се состои од три човечки фигури високи 30 метри од перфорирани алуминиумски плочи. Непосредно пред почетокот на Европското првенство во фудбал во Германија, трите човечки фигури на скулптурата беа „облечени“ во дресови на германската фудбалска репрезентација.

Таа е изум на еден унгарски професор, архитект и пронаоѓач, Ерно Рубик, во пролетта 1974 година, во образовни цели. Но, Рубиковата коцка брзо стана популарна ширум светот. До денес „магичната коцка“, механичка загатка, ги фасцинира луѓето во цел свет, вклучувајќи ги и овие млади учесници собрани на повик преку социјалните мрежи во унгарскиот главен град Будимпешта.

Во Долината на смртта во пустината Мохаве во Калифорнија, најсувото место во САД, температурите достигнаа дури 50 Целзиусови степени - нов рекорд во Националниот парк во Долината на смртта, каде претходна највисока температура од 49,4 Целзиусови степени беше измерена во 1996 година.