„За да се настапи како жива статуа потребнa е физичка и психичка подготвеност, трпение. Подготовката за еден настап трае околу час, час и половина. Вежби за загревање на телото, шминка, времето за преминот - јас како Енџи во актот, се дел од процесот“, вели младата актерка Енџи Николовска.
Настапот на улица не е едноставен. Реакциите на публиката се позитивни, но се случува по некој и да ги турне за да се увери дека се „вистински“:
„Тешкотиите што вие не ги гледате најверојатно и не можат да се препознаат, зашто кога ќе ги видиме реакциите од публиката не се забележува ништо што се случува во позадина, односно само ние тоа го знаеме. Болка и не постои, затоа што имаме одличен фидбек од публиката.”
Младата актерка, како дел од продукцијата „Театроск“ редовно настапува на Статуафест – уличен уметнички фестивал на живи статуи. Тоа ги надополнува нејзините приходи, кои кај младите актери во Македонија не се високи. Иселување заради подобар живот и себеостварување засега не е опција за Енџи Николовска. Таа бара државата повеќе да вложува во културата и да поддржува настани како Статуафест:
„Институциите и државата да вложуваат повеќе во тоа, затоа што на некој начин тоа е мотивацијата на младите. А нормално, секој од нас би сакал да остане дома, а видиците ги проширува надвор.”