Доживотен затвор за убиството поради заштитна маска

Убиството на момчето вработено на бензинска пумпа ја згрози Германија. Судот во Бад Кројцнах сега го осуди на доживотен затвор убиецот на момчето вработено на бензинска пумпа, кое беше застрелано по судир околу заштитна маска.

Убиството се случи на 18 септември 2021 година, во Идар-Оберштајн. Момчето вработено на бензинската пумпа не сакало да му продаде пиво на муштеријата кој немал заштитна маска. По кавгата, муштеријата отишол дома, зел оружје, за кое немал дозвола, се вратил на бензинската пумпа и го убил момчето. Убиецот го призна делото, а како доказ служат и видео снимките од местото на убиството.

Одбраната тврдеше дека убиецот во моментот на кривичното дело имал многу ограничена способност за расудување, со оглед на тоа што во време на убиството имал околу два промили алкохол во крвта. Во судскиот процес, кој траеше половина година, котужител беше и мајката на 20-годишната жртва.