Биркеншток: Како германските сандали станаа култ

Сандалите Биркеншток долго предизвикуваа потсмев. Со години, овие еколошки, ергономски сандали беа сметани за практични, но не и модерни. Германските туристи кои ги носеа во странство беа исмевани. Денес, Биркеншток поставува рекорди во продажба, не само во Германија, туку и глобално.

Легендарните Биркеншток сандали се појавија и во хит-филмот „Барби“, кога стереотипната Барби ги отфрли своите високи потпетици во замена за кафеави Биркеншток за да го истражи „вистинскиот свет“ надвор од Барбиленд. Сцената придонесе за огромен скок во продажбата на Биркеншток сандалите.

Германската компанија која ги произведува сандалите е стара над 200 години, а корените ѝ се во основачот Јохан Адам Биркеншток, кој ги создал првите модели во 1774 година. Еден од најважните моменти за фабриката се случува во 1897 година, кога Конрад Биркеншток ја создава првата контурирана влошка. Но, минува уште долго време додека сандалата да стекне популарност.

Пресвртот го донесе неговиот внук, Карл Биркеншток. Во 1963 година, тој почна да продава ортопедски сандали чиј приоритет беа функционалноста и квалитетот пред естетиката. Здравствените работници беа главна мета на чевелот, кој си најде дом на клиниките и во лекарските ординации.

Откако германо-американката Маргот Фрејзер ги откри сандалите за време на престојот во Германија во 1966 година, таа започна да ги дистрибуира во САД. Од 1970-те натаму, тие станаа омилена обувка на хипиците. Биркеншток станаа симбол на контракултурата и антиконформизмот.

Од 1990-те, Биркеншток почна да се етаблира во модниот свет. Соработката со луксузните брендови како Диор, Рик Овенс и Валентино придонесоа за промена на имиџот. Фотографијата на супермоделот Кејт Мос со сандалите ги претворија во модна изјава. Хајди Клум дизајнираше сопствена колекција во 2003 година. (фотографија)

На почетокот на 2021 година, Л Катертон, приватна инвеститорска компанија во која удел имаат Бернар Арно и неговиот луксузен конгломерат ЛВХМ, купи акции во Биркеншток. Вредноста на акциите на Биркеншток во тој период беа проценети на 4 милијарди евра.

Експертите ја проценуваат вредноста на берзанската понуда на над 8 милијарди евра. Тоа најверојатно ќе промени некои нешта, како сопственичката структура на семејната фирма. Она што ќе остане е седиштето на фабриката во Германија, каде се одвива 95% од производството.