Бербок на средба со шефовите на дипломатии од Западен Балкан

Перспективите за приклучување кон Европската унија се тема на денешната средба на германската министерка за надворешни работи Аналена Бербок со шефовите на дипломатии од земјите од Западен Балкан. Во фокусот на разговорите што ќе се водат во германското МНР е активирањето на регионалниот договор за слободна трговија Цефта (Централноевропски договор за слободна трговија), кој има за цел да ги намали трговските бариери. Спроведувањето на договорот досега беше блокирано поради спорот околу прашањата за статусот меѓу Косово и Србија. До неодамна беше нејасно дали Косово ќе се согласи со договорот и дали натамошна блокада може да доведе до договор без Косово доколку е тоа потребно. Во државите кои се дел од Цефта се вбројуваат Албанија, Црна Гора Босна и Херцеговина, Косово,  Северна Македонија, Молдавија, и Србија.

Денешната средба во Берлин се смета за подготвителна пред самитот на шефовите на држави или влади на 14 октомври во Берлин. Таа се одржува во рамки на т.н. Берлински процес, кој беше инициран од страна на Германија, а има за цел да го забрза приближувањето на балканските земји кон ЕУ. Со Берлинскиот процес би требало да се интензивира регионалната соработка на државите од регионот. Таа опфаќа сфери како економски развој, консолидација на правната држава, образование и наука, како и дијалог на граѓанското општество.