Белорусија: 10 години затвор за Нобелов лауреат

Судот во Белорусија денеска го осуди добитникот на Нобелова награда за мир, продемократскиот активист Алес Бјаљацки, кој се наоѓа во притвор во Минск, на 10 години затвор поради финансирање на протестите во 2020 година и за затајување на данок.

Алес Бјаљацки, продемократски активист и основач на центарот за човекови права Вјасна, која обезбеди правни и финансиски услуги како помош за демонстрантите за време на бранот немири во Белорусија во 2020 година, е осуден за финасирање на протестот и за затајување на данок.

Тој рече дека е прогонуван поради политички причини. Центарот за човекови права Вјасна беше создаден во 1996 година како одговор на брутално загушените улични протести против режимот на Александар Лукашенко.

Првпат Алес Бјаљацки беше уапсен во 2011 година и помина 3 години во затвор поради обвиненија за затајување на данок, кои ги негираше. Тој беше приведен и во 2020 година по масовните протести поради, како што белоруската опозиција и независните набљудувачи велат, наместените претседателски избори во Белорусија благодарејќи на кои Александар Лукашенко остана на власт.

Групите за заштита на човековите права наведуваат оти во Белорусија има околу 1.500 политички затвореници, а голем број од нив се уапсени по протестите во 2020 година.

Алес Бјаљацки во минатата година ја доби Нобеловата награда за мир и е четврто лице во 121-годишната историја на Нобеловата награди кое ја примило наградата додека било во затвор или во притвор.