10 гафови што треба да ги избегнете во Германија
Сакате да се вклопите во Германија? Тогаш подобро да знаете кога некому да посакате среќен роденден и како да ја запалите цигарата. Еве го нашиот водич за избегнување гафови во Германија.
Не кажувај „на здравје“ без контакт со очи
Со оглед на големите количества пиво и вино кои многумина Германци ги консумираат би помислиле дека наздравувањето е едноставна задача, но за секое „На здравје!“ или „Прост“ постојат неколку важни правила. Кога чашите се допираат мора да се воспостави контакт со очи и да се наздрави со сите присутни поединечно. Во спротивно може да испаднете неучтиви, а суеверните ризикуваат седум години лош секс.
Почитувај го црвеното човече на семафорите
Клишето дека Германците сакаат да ги почитуваат правилата не е секогаш точно, но кога се работи за малиот „Ампелман“ – светлечката фигура која им дава знак на пешаците кога да ја поминат улицата - сигурно е така. Невнимателното преминување на улица не ги радува Германците, особено ако тоа го правите пред деца - кои можат да ја имитираат туѓата непромисленост.
Не ја пали цигарата со свеќа
Може да се чини како лесно решение. Сакате да ја запалите цигарата иако немате запалка, но на масата покрај вас има свеќа. Ваквиот невнимателен потег ќе го налути секој Германец во собата и веројатно ќе загрози морнар! Зошто? Се верува дека некогаш морнарите продавале ќибрит за време на зимата за да преживеат. Некористењето на ќибрит може да ги уништи – или уште полошо.
Не бидете гласни во недела
Можеби мислите дека недела е совршен ден за вршење на домашните обврски: косење на тревата, чистење со правосмукалка и перење на облека. Бидете внимателни – во Германија, неделите се „Ruhetag,“ или „денови за одмор“. Повеќето продавници не работат и соседите ќе се жалат доколку бучавата ги вознемирува.
Не го мешај ѓубрето
Рециклирањето е сериозна работа во Германија, а правилното рециклирање значи правилно сортирање на отпадот. Затоа не ни помислувајте да ставите пластика во корпата за хартија. Вашите соседи ќе ве презираат, а може да добиете и писмо со гневен тон. Затоа запомнете: Жолтата корпа е за пластика, зелената (или сината) за хартија, кафената за органски отпад и сивата за се останато.
Соблекување!
Се вели дека „културата на слободно тело“ потекнува од Германија – и тоа со причина. Многу Германци сакаат да се ослободат од облеката на некоја нудистичка плажа и да се шеткаат наоколу како Адам и Ева. Независно од тоа колку си стар, како изгледаш или со кого си – на определени нудистички места и сауни, подобро да се соблечете голи, инаку ќе бидете сметани за неучтиви.
Розите се црвени, белите цвеќиња се табу
Постојат неколку комплицирани правила за цвеќињата во Германија и може да се доведете во непријатна ситуација доколку истите не ги почитувате. Црвените цвеќиња – особено црвените рози – исклучиво се подаруваат на луѓе со кои сте романтично поврзани. Белите цвеќиња се сметаат за гробни декорации и се употребуваат кога некој ќе почине. Консултирајте го цвеќарот за помош пред да навредите некого.
Никогаш не доцнете
Германците се познати по својата точност и доцнењето се смета за многу неучтиво. Дури и петминутно доцнење може да биде навреда. Доколку доцните, јавете се и извинете се однапред. Доколку забавата започнува во 18 часот, немојте да пристигнете во 19 часот. Шест попладне значи точно шест попладне.
Среќен роденден
Во Германија, родендените секогаш се слават на самиот ден и ниту минута порано. Се честита „влегувањето“ на славеникот во родениот ден на полноќ (познато како „reinfeier“) – дури и за време на работната недела. Посакувањето „среќен роденден“ на Германец пред точниот датум на раѓање може да доведе до лути погледи. За повеќето Германци, прераната роденденска честитка значи лоша среќа.
Бесплатна и вистинска вода
Во Германија водата од чешма е одлична, но никогаш не нарачувајте ја во ресторан. Келнерот може да се налути и да одбие да ви донесе „бесплатна вода“. Доколку сте на гости и побарате вода од чешма, домаќинот сигурно ќе се погрижи да ви даде до знаење - има и „вистинска вода“, т.е. минерална вода. Минералната вода во Германија се смета за „вистинска вода“.