Среќен роденден, Мадона
Легендарната пејачка полни 60 години. По тој повод правиме преглед на нејзината уникатна кариера, различните имиџи, нејзините бесни, иконски настапи, актерството и добротворната работа.
Бунтовничката
Мадона Луиза Чиконе се претстави во повеќе верзии во својата речиси 40-годишна кариера. Хитот "Like a Virgin" ја катапултираше во статус на суперѕвезда во 1984 (на фотографијата). На МТВ музичките награди излезе од свадбена торта облечена како невеста, танцувајќи ласцивно, а потоа се превртуваше по подот во сугестивна поза.
Музата на Готје
Мадона не ја интересира конвенцијата, особено не кога станува збор за модата. Со нејзината секси и провокативна репутација, не е ни чудо што беше привлечена од сличен „енфан терибл“: францускиот дизајнер Жан Пол Готје. Тој дизајнираше дел од нејзините костуми за настапи, вклучително и легендарниот корсет.
Актерка
Актерската кариера на Мадона не секогаш беше спектакуларна. Освои повеќе „Златни малини“ за особено лоша глума. Во 1990 глумеше заедно со Ворен Бити во Дик Трејси и доби големи пофалби за улогата. Инспирирана од филмот, го продуцираше албумот Breathless со мега хитот "Vogue."
Секс бомба
За многу кусо време Мадона стана суперѕвезда, но продолжи енергично да работи на својата кариера, со тенденции кон еротски самопортретирања и егзибиционизам. Документарецот од 1991 - Мадона: Вистина или храброст, е хроника на нејзините турнеи и приватен живот. Неколку години подоцна колекцијата на еротски фотографии наречена Секс се продаде во милиони примероци.
Езотерија
Мадона се открива себеси одново и одново. Во 1998 го издаде синглот "Frozen" од албумот кој победи на Греми, Ray of Light. Мадона ги напушти костимите на Готје, ласцивното танцување и еротските алузии. По раѓањето на своето прво дете, се претстави во езотерично светло и далеку поконзервативна од кога било претходно.
Бакнежи на јавна сцена
Мадона сепак никогаш целосно не го загуби еротскиот набој. На МТВ наградите во 2003 ги бакна колешките Кристина Агилера и Бритни Спирс на сцената. Во 2015, излезе видео-клип на кој го бакнува канадскиот рапер Дрејк. Тој не делуваше премногу возбуден.
Сопруга
Мадона го нарекуваше својот прв сопруг, актерот Шон Пен „најкул маж во универзумот“ и му го посвети албумот "True Blue". Бракот издржа четири години. Во 1996 година ја доби ќерката Лордес со својот личен тренер и момче Карлос Леон. Во 2000 се омажи за британскиот режисер Гај Ричи со кого го доби синот Роко. Бракот траеше осум години.
Мајка
Мадона не застана на две биолошки деца: во 2006 ја посети африканската држава Малави, го сретна 13-месеци стариот Давид и го посвои. Критичарите велат дека го купила правото да го посвои. Повторно во Малави во 2009 ја посвои Мерси, а во 2017 и близначките Естер и Стела, со што се комплетираше семејството.
Добротворна работа
Мадона ја основаше организацијата Raising Malawi во 2006 со цел поддршка на луѓето на една од најсиромашните земји во светот. Во едукативни и здравствени проекти таа инвестираше милиони долари од своето богатство.
Поп ѕвезда
Кариерата на Мадона отсекогаш ја следеле озборувања, скандали, подеми и падови. Отпишувана од критичарите повеќепати, таа секогаш се враќа на сцената со нов хит. Турнејата Бунтовничко срце од 2015 (на фотографијата) засега е нејзината последна. Обожавателите можат да очекуваат нов албум до крајот на годинава. Тоа ќе биде нејзиниот 14 студиски албум.