Се затвора обрачот околу Мосул
2 ноември 2016Две недели по почетокот на офанзивата за ослободување на Мосул, последното големо упориште на Исламската држава во Ирак, ирачките војници пристигнаа на само неколку километри од метрополата.
Најголемиот пробив е направен кон левиот брег на градот, велат ирачки воени команданти. Мосул е поделен од реката Тигрис, а источниот дел на градот се смета за лев брег.
Елитните ирачки сили го освоија клучното село Гоѓал и ја презедоа контролата врз зградата на телевизиската станица „Иракија“ на источната периферија на градот.
Според проценките, во Мосул се стационирани меѓу 4 и 7 илјади џихадисти на Исламската држава.Портпарол на коалицијата предводена од САД, полковникот Џон Доријан, соопшти дека од почетокот на офанзивата врз позициите на ИД биле испукани „околу 3 илјади бомби, артилериски гранати, ракети и проектили“.
„Уништивме стотици борци, борбени позиции и оружје“, тврди Дорија.
Коалициските трупи тврдат дека се обидуваат да го заобиколат Мосул од сите страни, и да ги блокираат сите можни отстапници за борците на ИД. Но, според репортерите на теренот, на џихадистите сепак им останува можноста да бегаат на запад, кон Сирија, каде ИД сѐ уште контролира делови од територијата.
Откако ќе биде затворен обрачот, ирачките сили се очекува да отворат безбедни коридори за цивилното население. ОН проценуваат дека околу 600 илјади деца би можеле да останат заглавени во Мосул. Досега од градот успеале да избегаат околу 18 илјади луѓе.