Светските градови растат- Скопје напредува

Скопје се искачи од последното, 150-то на 88. место во светот, според ранг-листата на консултантската куќа „Најт Франк“. Во анализата за првиот квартал од 2017 година, Скопје беше убедливо на последното место со пад на цените на недвижностите од 7 проценти. Но, во деновиве објавената нова ранг-листа, заклучно со четвртиот квартал од 2017, Скопје се искачи на 88. место со раст на цените од 3,5 проценти.

„Најт и Франк“ објавува редовни квартални извештаи кои го мерат индексот за домување во најголемите светски градови. Според последниот индекс, Скопје забележило голем напредок на листата, што значи дека цените на недвижностите започнале да растат.

На врвот на листата за 2017 година се наоѓа Берлин, каде цените на недвижностите пораснале за 20,5 проценти. Германскиот главен град се искачил на врвот благодарение на големиот раст на населението, стабилната економија, рекордно ниската невработеност и големиот интерес на странските инвеститори, кои заедно ги движат цените нагоре. 

На второ место е турскиот Измир со раст од 18,5 проценти, а на трето главниот град на Исланд- Рејкјавик со 16,6 отсто раст. Уште два германски града, Хамбург и Минхен се најдоа во топ-10 листата.
Добриот пласман на листата не секогаш е резултат на позитивен развој, како што покажуваат примерите на повеќе градови. Во канадскиот Ванкувер но и некои градови во САД, на пример, цените растат поради недостаток на станбени површини или недвижности на пазарот. 

Целата анализа можете да ја прочитате на следниот линк.