Русија е закана за мирот и безбедноста во Европа

Дејствијата на Русија се закануваат на мирот и безбедноста во Европа, изјави генералниот секретар на НАТО, Андерс Фог Расмусен, пред почетокот на вонредната седница на Северноатлантскиот совет и на комисијата НАТО-Украина, закажани за попладнево.

Расмусен прецизира дека ја свикал вонредната седница на Алијансата поради воените дејствија на Русија во Украина и поради заканите на рускиот претседател Владимир Путин против оваа суверена нација.

Според генералниот секретар, руските активности ги прекршуваат принципите на Повелбата на ОН.

„НАТО ја повикува Москва да ги прекине заканите и своите воени актвиности. Ќе го разгледаме одразот на овие дејствија врз мирот и безбедноста, како и нашите односи со Русија“, изјави Расмусен. Тој посочи дека Алијансата ја поддржува територијалната целост и независноста на Украина, како и правото на украинскиот народ без надворешно мешање да ја определи својата иднина.

„Украина е наш сосед и ценет партнер на НАТО. Ги повикуваме сите под итно да продолжат со напорите за одалечување од оваа опасна ситуација. Ја повикуваме Русија да содејствува во намалувањето на тензиите“, изјави Расмусен.