Политичарите и нивните кучиња
Политичарите се познати по тоа дека ги инсценираат вешто своите домашни миленици, особено кога ќе се најдат во тешка ситуација. Од неодамна и британскиот премиер Борис Џонсон е горд сопственик на куче.
Борис Џонсон и Дилан
Новиот љубимец на британскиот премиер Борис Џонсон неодамна се всели во Даунинг стрит 10. Џонсон од домот за напуштени животни го посвои малиот териер мешанец. Името му е Дилан (Dilyn) - изведено од велшкиот збор „следи“. Тоа е алузија на Велс, делот од Обединетото Кралство, каде што кученцето е родено пред 15 недели.
Владимир Путин и Верни
Рускиот претседател Владимир Путин е познат како љубител на животни. Радо се фотографира со поларни мечки или сибирски тигри. Во 2017 година на туркменистанскиот претседател Гурбангули Бердимухамедов за роденден му подари централноазиски овчар со име Верни. Името говори само за себе.
Владимир Путин, Ангела Меркел и Кони
Путин во 2007 година на средбата со германската канцеларка Меркел го доведе својот црн лабрадор Кони. „Кучето не Ви пречи, нели?“, наводно ја прашал канцеларката. Кони е послушно куче, кое знае да се однесува, рекол Путин во текот на разговорот. Тоа било вистинско промашување: Меркел се плаши од кучиња откако едно куче ја гризнало во 1995 година.
Шарпланинецот Паша како подарок за Путин
Во текот на официјалната посета на Србија претседателот Александар Вучиќ му подари на Владимир Путин тримесечен шарпланинец. Расното куче отпатува за Москва, од каде што следуваше повик со барање за детален план за исхрана. Тоа ѝ стави крај на полемиката за тоа дали Паша отпатувал во Москва или останал во Белград.
Барак Обама и Бо
Поранешниот американски претседател Барак Обама е апсолутен медиумски професионалец. Неговата харизматична појава насекаде привлекуваше внимание. Само неговото куче Бо знаеше одвреме-навреме да му го украде шоуто.
Џорџ Буш и Барни
Териерот на поранешниот американски претседател Џорџ Буш беше толку познат, што Белата куќа му посвети посебен дел на официјалната веб-страница. Американските медиуми честопати го прикажуваа Барни како трча по тревниците пред Белата куќа и 43-от претседател на САД кој со голема насмевка се обидува да фати чекор со својот љубимец.
Шредерови и Холи
Поранешниот германски канцелар Герхард Шредер и неговата поранешна сопруга Дорис Шредер-Кепф во 2003 година го проширија своето семејство со бордер териер. Кучето почина од рак во 2017 година. Тогаш Дорис Шредер-Кепф преку Фејсбук ја извести јавноста за неговата смрт.
Емануел Макрон и Немо
И францускиот претседател Емануел Макрон исто како британскиот премиер Џонсон вдоми куче од дом за напуштени животни. Мешанецот лабрадор-грифон Немо го има добиено името по капетанот Немо од романот „20.000 милји под морето“. За Макрон велат дека го обожава романот на Жил Верн.
Кралицата и нејзините кучиња
Британската кралица Елизабета Втора е една од најпознатите личности на светот. Речиси исто толку познати се и нејзините корги-кучиња, кои со децении го следат кралското семејство. Кралицата ја сака таа раса уште откако за својот 18. роденден добила на подарок корги со име Сузан. Но, кралицата (овде во 1998) имала и други раси кучиња, како кокер шпаниел и „дорги“ - мешанци од корги и јазовичари.