Погрешни формули за Косово

Германскиот Бундестаг , вчера го продолжи мандатот на својата армија, Бундесверот во рамките на КФОР , иако владејачките партии го одбија барањето на опозиционерите да се преиспита политиката на меѓународната заедница во покраината. Ова но и заминувањето од функцијата на шефот на УНМИК , Хари Холкери , го поттикнаа германскиот печат на анализа на ситуацијата во покраината

Весникот Франкфуртер Алгемајне Цајтунг истакнува:

“Таму веќе пет години постои меѓународно воено присуство , но изгледите за мирна иднина и натаму не станаа поконкретни. Напротив , повеќе може да се каже дека најновите изливи на насилство во март годинава покажаа оти конфликтот е само замрзнат и дека спротиставените страни биле замолчени само поради меѓународниот притисок и тактички причини. Повеќе од неизвесно е дали европската перспектива за Балканот , за која постојано се залага министерот за надворешни работи на Германија, Јошка Фишер , ќе отвори нови хоризонти во регионот во кој политичката култура од западен тип, едвам се развила бидејќи и натаму се доминантни атавистички облици на национализам. Опозиционата Унија се залага владата да го преиспита политичкиот концепт за Косово. Тоа тешко дека ќе биде можно , бидејќи таков концепт всушностт воопшто нема. Формулите за кои досега се одлучуваше меѓународната заедница , не можат да ја прикријат општата збунетост”.- смета коментаторот на Франкфуртер Алгемајне Цајтунг.

Во Зидојче Цајтунг од Минхен пак на оваа тема читаме:

“Не е можно од денес за утре да бидат изградени структури кои овозможуваат макар малку слободен живот, и тоа во општество кое такво нештоо не познавало. Политичарите досега не сакаа на оваа вистина да и погледнат во очи. Нормално дека овој ангажман мора постојано да биде преиспитуван. И тука истотака лежи причината за неуспехот на Косово. Со други зборови недостасува јасна перспектива. Тоа важи и за целокупната управа на ОН на Косово но особено за присуството на Бундесверот . мартовските нереди таму предизвикаа шок. Тие покажаа дека Бундесверот по пет години својата работа не ја извршил онака , како што и самиот посакувал. Вредно за внимание е и тоа што инжинерските единици помагаат во обновата. Но што вреди тоа , кога германските мировни сили во случаи на тешки повреди на законите не интервенираат или неможат да интервенираат затоа што се изненадени ? Тие не се опремени за полициски задачи. Тие недостатоци се познати. Најавено е оти ќе бидат отстранети.”- потсетува Зидојче цајтунг.

За оставката на шефот на УНМИК , Хари Холкери, весникот “Франкфуртер рундшау” пишува:

“Уште кога стапуваше на должност , тој беше критикуван дека е стар и оти не го познава Балканот, што ни самиот не го криеше.Но,од самодисиплината и чесноста на овој човек многумина беа воодушевени. Уверен дека надминувањето на секој судир започнува со преговори , Холкери непосредно пред доаѓањето и покрај силниот отпор го покрена дијалогот Белград – Приштина.

Тој проект меѓутоа не напредуваше . Тешко бреме претставуваше и застојот во приватизацијата на оптествените претпријатија , па косовските Албанци , на крајот го прогласија Холкери за главен виновник за очајната економска ситуација. Мартовските погроми не само што разоткрија колку бајковидно звучеа приказните за мултиетничко Косово , туку фрлија и остро светло на фактот , колку протекторатот на Обединетите Нации е неефикасен во заштитата на своите жители. Сега се очекува новиот султан.

Неговите главни задачи ќе бидат да ги поправи разнишаните односи меѓу УНМИК и локалните партнери, да овозможи заштита на малцинствата по пат на децентрализација и до 2005-та да ги подобри стандардите на демократијата и на правната држава , со цел дискусијата околу статусот на Косово да може да започне. Но тие задачи , се всушност , нерешливи”- песимистичен е коментаторот на Франкфуртер Рундшау.