Најголем паркинг за велосипеди во светот

Велосипеди до каде што достига погледот. Во холандски Утрехт е отворен најголемиот паркинг за велосипеди во светот. Тоа беше и итно неопоходно, зашто статистиката вели дека во земјата има околу 22 милиони велосипеди. Во просек, значи, секој Холанѓанец има по еден велосипед.

Утрехт со своите 340.000 жители е четврт град по големина во Холандија. Градот важи за особено благонаклонет кон велосипедот како превозно средство. За да се воведе ред во хаосот, особено пред железничката станица, сега е отворен најголемиот паркинг за велосипеди во светот. Капацитетот во моментов е 6.000 места за велосипеди, а до крајот на 218. паркингот треба да се прошири уште за 6.500 места.

Проблемот е познат одамна. Местата на железничките станици се преполни. Половината од оние кои патуваат со воз, на станиците доаѓаат со велосипед. Тие се жалат дека места за паркинг се наоѓаат тешко. И тоа и покрај фактот дека во 2011 година се направени 100.000 дополнителни места за паркирање велосипеди ширум земјата. Очигледно - недоволно!

Сега, со новиот паркинг состојбата би можела малку да се релаксира, дотолку повеќе што во првите 24 часа велосипедот може да стои на паркингот бесплатно. Оние кои сакаат да паркираат подолго, плаќаат дневна тарифа од 1,25 евра за велосипед.

Сепак, планираниот голем паркинг во иднина би можел да стане мал. Со оглед на велосипедскиот бум во Холандија, се стравува дека местата нема да бидат доволно. Зашто, бесплатното паркирање велосипеди е особено привлечно за оние кои патуваат со воз до работното место. Со велосипед, па со воз, наместо со часови чекање во долги автомобилски колони - тоа изгледа привлечно за многумина.

Движење во насока на стрелката: за да се најде слободно место во огромниот паркинг, има помошни средства за ориентација. Исто како во автомобилските паркинзи, и овде местата за паркирање се обележани - со различни бои и бројки. На екран може да се види каде има слободно место. Едно место делат два велосипеда кои се паркирани на две нивоа, еден над друг.

Паркингот во Утрехт, кој чини 40 милиони евра, е предводник. И Ден Хаг планира паркинг со 8.500 места за велосипеди. Амстердам, чии 835.000 жители поседуваат 847.000 велосипеди, работи исто така на место за паркирање. Сепак, повеќето од велосипедите сѐ уште се потпрени на оградите на мовчињата преку каналите, што за туристите е омилен мотив за фотографирање.