Најголеми демонстрации по падот на Мубарак
28 ноември 2012На протестите во Александрија против проширувањето на овластувањата на претседателот дојде до судири меѓу приврзаниците и противниците на Мохамед Мурси. Имаше тепачки, се фрлаше со камења и молотови коктели, а бројот на повредени е голем.
Во индустрискиот град Махала демонстрантите го нападнаа партиското седиште на Муслиманското братство. Исламистите се обидоа да ја заштитат зградата со синџир од луѓе, но не успеаја да спречат судир. И во Махала летаа молотови коктели и има голем број повредени луѓе. Во Каиро пак, 52-годишен човек починал како последица на задушување од солзавец, соопшти египетското министерство за надворешни работи.
Додека на плоштадот Тахрир во Каиро повеќе од 300.000 луѓе протестираа против новите овластувања на претседателот, членовите на Клубот на судии се заканија со штрајк. Судијата Мохамед Самир изјави: „Ако претседателот се држи до Уставната изјава, ние ќе стапиме во штрајк.“ Претседателот на Клубот на судиите, Ахмед ел Зинд, упати итен апел до Мурси: „Господине Претседателе, не е срамота да го повлечете она што го наредивте. Напротив, тоа ќе ви донесе почит. Нашата земја е во пламен, само вие можете да го изгаснете тој пламен. Народот, првпат во египетската историја, е поделен. Таа поделеност може да биде почеток на нешто, што господ знае каде води. Господине Претседателе, декретите се неважечки.“
На настаните во Египет во странство веќе со денови се гледа со голема загриженост. За да се спречи натамошна ескалација дипломатите работат забрзано. Така е и во Белата куќа, каде портпаролот Џеј Карни изјави дека контактот со сите важни претставници на Египет е непрекинат. Тој побара да се почне дијалог. Меѓутоа, засега нема знаци дека внатрешнополитичката криза во Египет би можела да се смири. Двете спротивставени страни, исламистите и опозицијата, и натаму се на курс на конфронтација.