МВР молчи, СДСМ бара одговори за настаните во Куманово!

МВР утринава спроведе акција против вооружена група која имала за цел да организира напад врз државни институции, изјави портпаролот на МВР, Иво Котевски на денешната прес-конференција. Според МВР, станува збор за добро вооружена група која извршила напад од автоматско оружје и со бомби. Тој истакна дека специјалците наишле на силен и жесток вооружен отпор од страна на, како што рече, терористите. Котевски додаде дека поради специфичноста на теренот, кој е со тесни учички, е дополнителен ризик за полициските сили, заради што вршат тактичка операција и претрес на сите куќи.

Поради чувствителноста на состојбата, Котевски истакна дека нема да соопштува повеќе детали.

МВР апелира до граѓаните да останат во своите домови.

Во исто време со прес-конференцијата во МВР, изјава даде и лидерот на опозицискиот СДСМ, Зоран Заев. Социјалдемократскиот сојуз на Македонија ги повика граѓаните на смиреност и присебност, да не подлегнуваат на мрачни сценарија за предизвикување конфликтнoст и дестабилизација на Македонија.

„Го повикувам Никола Груевски веднаш да излезе пред граѓаните на Македонија и да им објасни кој, зошто, со каква цел ја дестабилизира Македонија? Дали и зошто криминални групи од територијата на соседните држави влегуваат во Македонија? Кој ги организира и со каква цел? Истото треба да го направи и Али Ахмети. Жртви се граѓаните и Македонци и Албанци, и полицајци и цивилно население. Сега најважно е да му се помогне на цивилното население и да му се обезбеди и гарантира сигурност и безбедност. Црното сценарио нема да успее. Граѓаните препознаваат кој има интерес од вакво сценарио и нема да дозволат да бидат вмешани во ваквото сценарио. Македонците, Албанците и сите други граѓани се заедно како никогаш досега. Убеден сум дека тоа така и ќе остане“, потенцираше Заев.