Италијанскиот премиер Драги поднесе оставка

Италијанскиот претседател Серџо Матарела одби да ја прифати оставката на премиерот Марио Драги поднесена попладнево. Матарела му порача на Драги да разговара со пратениците и да се обиде да најде ново мнозинство во парламентот откако популистичкото движење Пет ѕвезди одби да ја поддржи владата за клучно гласање.

Во теорија, одбивањето на Матарела значи дека очекува од Драги да формира ново мнозинствоз, најверојатно без популистите кои започнаа отворен судир со премиерот од почетокот на руската агресија врз Украина. 

Доколку Драги не успее да пронајде ново мнозинство, Матарела може да го распушти парламентот и да закаже нови избори во септември. Мандатот на актуелниот парламент истекува пролетта 2023.

Драги се одлучи на оставка откако Движењето Пет ѕвезди не го поддржа гласањето за пакетот вреден 26 милијарди евра за помош на потрошувачите и индустријата поради растечките цени на енергенсите. 

Широката владина коалиција беше формирана со цел да и помогне на Италија да се извлече од пандемијата на коронавирусот, и во неа вклучени партии од левицата и десницата.

„Компактноста беше основа за соочување со предизвиците овие месеци. Тие услови повеќе не постојат“, изјави Драги. 

Движењето Пет ѕвезди по влегувањето во владата загуби значителен дел од поддршката која продолжува да паѓа, според анкетите. Од движењето се жалат дека нивните интереси се игнорираат. Меѓу мерките на кои се спротивстави популистичкото движење е и можноста градот Рим да добие печка за палење на огромниот отпад кој го задушува главниот град.