Дизајн на иднината
Што е добар дизајн? Одговорот на прашањето го доближуваат креациите на 500 дизајнери од 30 земји кои годинава учествуваа на Меѓународниот фестивал за дизајн во Берлин. Фокусот беше ставен на полската дизајнерска сцена.
Полска во фокусот
Меѓународната дизајнерска сцена се собра во Берлин на DMY Меѓународниот фестивал за дизајн. Фокусот беше ставен врз Полска. Околу 40 полски дизајнери, студија и претпријатија се презентираа пред светот. Своите визии ги прикажаа и млади креативци, како студенти од Училиштето за дизајн во Гдањск (фотографија). Што е она што му дава белег на полскиот дизајн?
Плетен табурет
Особеното на полскиот дизајн е блискоста до занаетчиството, вели Марцин Застрожњи од Полскиот институт во Берлин. Традиционалните материјали, како дрво или штоф, играат голема улога. Тоа може да се види и од овој табурет на дизајнерската фирма Мономока од Вроцлав. Двете дизајнерки ги исплеле посебно елементите на табуретот, а потоа ги поврзале.
Жиента - ѕвезда во подем
Оскар Жиента е ѕвезда во подем на полското дизајнерско небо. Пред неколку години тој го креираше табуретот „Плоп“ (на фотографијата), кој имаше голем меѓународен успех. Со технологијата на Жиента „Фиду“ е можно предмети од лим да се виткаат во мал формат, а потоа да се надујат. Дизајнерот сега се обидува да ја пробие својата технологија во сфери како вселенската технологија.
Функционална играчка
Дизајнерот Бартош Муха дизајнираше серија практични дрвени играчки. Дел од нив е и ова возило-четка. Со него може да се чисти и подот или да се исчеткаат чевлите, вели Муха, за кого DMY е добра можност за нови контакти со фирми и муштерии.
Глобален дизајн
Историјата на полскиот дизајн не е долга. Дури по падот на железната завеса се создадоа поволни услови. Браншата денес бележи голем подем. И во меѓународни рамки се позиционира добро и има добра соработка. Фирмата Нокаут Дизајн (на фотографијата) соработува, на пример, со палестински уметници.
Стилско живеење во комунистички бетонски згради
На DMY се прикажуваат и трендови, како "Do-it-yourself". Во овој проект повеќемина дизајнери соработуваат со градежното здружение Берлин-Мите. Нивната задача е да ги разубават становите во зградите од бетонски плочи, карактеристични за времето на комунизмот. Притоа, се креираат тапети што може да ги лепите самите (на фотографијата) и мебел кој сами го монтирате. Упатствата се наоѓаат на интернет.
Печатење во 3Д
Ова е техника која го револуционизира дизајнот - печатење во 3Д. На DMY беа презентирани печатачи (на фотографијата) и нови можности за дизајнерите. Со 3Д-печатач дизајнерот може и сам за многу кратко време да ги изработи своите креации.
Лампа како робот
Дали е лампа или машина? На фестивалот за дизајн има и футуристички креации. Лампата "The Worker" на Паскал Хауи од страна на Здружението на германските инженери е призната како робот. "The Worker" е висока речиси четири метри. Нејзината употребна вредност се‘ уште не е дефинирана - ќе биде помошен апарат на градилиштата или футуристичка лампа за читање?
Експериментални проекти
Кога се зборува за дизајн, не се мисли само на индустриски дизајн и дизајн на производи, туку многумина дизајнери се занимаваат и со експериментални концепти. Како да се визуелизира тонот? Како да се уреди урбаното живеење во време на ограничен простор? Поранешниот аеродром во Берлин - Темпелхоф, е одличен креативен простор за размена на визии за иднината. Учесниците на DMY се уверија во тоа.