Детска анимирана серија ја подели Данска

Данска анимирана серија за деца за човек со суперсила и бесконечно долг пенис го подели мислењето меѓу родителите и политичарите во Данска. Емисијата „Џон Дилерманд“ (на македонски Џон Пенисовски) се емитуваше на државниот радиодифузер од крајот на декември. Во претставата се појавува анимиран човек од глина во црвено-бела облека, со продолжен  - понекогаш корисен, понекогаш надвор од контрола, но сепак целосно облечен - пенис.
Дури и во далеку познатата прогресивна Данска, не се сите задоволни. Некои Данци на социјалните мрежи ја критикуваа емисијата, нарекувајќи ја „одвратна“ и „под стандардите“. Други ја нарекуваат „смешна“ и „безопасна“. Интересно е што станува збор за емисија којашто е наменета за деца на возраст од 4 до 8 години.
„Дали јас сум единствениот што смета дека е за осуда што на децата треба да им биде забавно да гледаат пениси на ДР?, напиша на Твитер, Мортен Месершмит, пратеник на конзервативната Данска партија на народот. 

Писателката Ана Лисе Марстранд-Јоргенсен праша дали емисијата е „навистина пораката што сакаме да им ја испратиме на децата, во време кога сме среде огромен #metoo бран?“. Станува збор за социјално движење наречено #metoo против сексуална злоупотреба во светот. 
Во ТВ-емисијата, пенисот се фаќа на вратата од автобус, држи балони додека ликот од анимираниот филм лета нагоре во воздухот и се користи и како ротор на хеликоптер и како камшик за да се скроти лав.
Државниот радиодифузер вели дека емисијата има за цел да ја разбуди љубопитноста кај децата за нивните тела, вклучувајќи ги и деловите коишто би можеле да ги сметаат за срамотни, преку лик кој е возрасен и истовремено и детски, со необично тело.
„Малите деца уживаат да бидат голи и да се истражуваат себеси. Тие играат дека се лекари, се прегледуваат едни со други и сакаат безобразни изрази“, вели Маргарет Брун Хансен, психолог за деца која што била консултирана при изработката на шоуто.