Груевски: Никој во ВМРО- ДПМНЕ не се чувствува виновен

Лидерот на ВМРО- ДПМНЕ Никола Груевски ги информираше новинарите дека партијата во текот на вчерашниот ден вршела анализи и консултации и дека сака уште еднаш да се произнесе по повод прес-конференцијата на претседателот Ѓорге Иванов. Не се сомневаме во неговите добри намери, не се сомневаме ниту во законитоста и уставноста на неговата одлука, рече Груевски, додавајќи дека сепак сака да укаже на следното:

„Прво, сакаме уште еднаш силно да се оградиме од оваа одлука на Претседателот. Таа одлука не е во склад со нашите заложби и му помага на СДСМ. Спротивна е на многу наши заложби. Ставот на ВМРО- ДМПНЕ е дека тој кој направил криминал треба да одговара.

Второ, никој во ВМРО- ДПМНЕ не се чувствува виновен. Оттгука никој од нас не посакуваше да има прекин на постапките за што Иванов донесе одлука. И покрај очигледното непрофесионално однесување на структурите на СЈО и заземањето страна, во случајот страната на СДСМ, ние сме убедени дека низ правна постапка ќе се покажеше вистината.

Трето, жалиме што оваа одлука значи ослободување од гонење на Зоран Заев и Зоран Верушевски, како и неколкумина други нивни соработници. Овие двајца луѓе ставајќи се во туѓ интерес ѝ нанесоа огромна штета на државата и народот и тие требаше да одговараат. “

Груевски тврди дека интерес на СДСМ е „во земјата да има анархија, да има безредие и хаос“, но тоа, како што рече не е „интерес на граѓаните и на ВМРО- ДПМНЕ“. Според лидерот на ВМРО- ДПМНЕ, „наш заеднички интерес е земјата да оди напред, демократијата да функционира, одлуките на фер и слободни избори да ги носат граѓаните“.

Груевски тврди дека „СДСМ заедно со Соросовите здруженија и невладини органзиации и онака планираа овие денови да прават протести секој ден со цел влошување на атмосферата и ескалација на состојбите“, а со крајна цел - одложување на изборите.

Тој го повика СДСМ да излезе на избори и „да не се плаши од народот“:

„Повикуваме на заедничко дејствување во корист на иднината на државата и граѓаните. Поделби и насилства нема да нѐ одведат никаде.“

Груевски и лично му се обрати на лидерот на СДСМ Зоран Заев, притоа коментирајќи ја неговата изјава за телевизија Телма, во која тој не исклучи украинско сценарио во Македонија:

„Додека стојам тоа нема да ти го дозволам. И самиот си свесен дека народот сака да заврши кризата. Престани да ги организираш хулиганите да го реметат мирот на граѓаните. Собери еднаш храброст и излези да се соочиш со народот на избори, на фер и демократски избори. Доста бараш изговори.“

Одговарајќи на прашањата на новинарите, Груевски рече дека за одлуката на Иванов дознал од медиумите, а што се однесува до тоа дали ја прифаќа аболицијата или не, тој изјави:

„Од она што се консултирав во теко на вчерашниот ден со врвни правници, адвокати, никој во државата нема можност да прифати или не прифати, за жал.“

Новинарите го прашаа и дали ќе побара оставка од претседателот Иванов, на што Груевски одговори дека Претседателот немал направено уставна или законска грешка за да може да се покрене што било.