Глобалната елита во Рајските документи
Новинарите објавија серија тајни документи кои откриваат чудни инвестиции и избегнување данок од страна на моќните и богатите. Откритијата се на истиот тим кој ги објави „Панама пејперс“.
Боно и „Нуд Естејтс“
Фронтменот на U2 и активист Боно е едно од најзвучните имиња во документите. Во комплицирана мрежа на финансиски трансакции, Боно инвестирал во компанија од Малта наречена „Нуд Естејтс“, која пак била вмешана во спорен договор за трговски центар во Литванија. Малта е позната по своите либерални даночни политики. Портпарол на пејачот тврди дека нема ништо нелегално.
Американскиот министер за трговија
Министерот за трговија на САД, Вилбур Рос се наведува во документите поради неговите удели во руската компанија за гас, Сибур. Рос сега се соочува со обвинувања дека ги прикривал врските со Русија пред Конгресот. Тој пак тврди дека компанијата со која соработувал не била под санкции од САД, па немал ниту обврска да информира за тоа.
Приватниот имот на кралицата Елизабета
Кралицата Елизабета собира приходи од нејзиниот приватен имот, Војводството Ланкастер. Според Рајските документи, војводството инвестирало 10 милиони фунти во офшор сметки во Бермуда и Кајманските острови. Одговорните велат дека инвестициите биле легални.
Шампионот во Формула 1
Актуелниот првак во Формула 1. Луис Хамилтон избегнувал плаќање данок за својот приватен авион преку специјално дизајнирана шема, според документите. Рајските документи покажуваат дека Хамилтон добил поврат на данок во износ од 3,3 милиони фунти, откако го увезол својот авион од Ајл оф мен, офшор остров во близина на западниот брег на Англија.
Поранешниот германски канцелар
Името на Герхард Шредер, германски канцелар од 1998 до 2005 година, се споменува поради неговата менаџерска ролја во руско-британската енергетска фирма ТНК-БП во 2009. Компанијата била регистрирана во даночната оаза Британски Девствени острови. Во 2013 ТНК-БП била купена од рускиот енергетски гигант Роснефт, каде Шредер во меѓувреме стана директор на бордот.
Колумбискиот претседател
Според сознанијата во документите, колумбискиот претседател Хуан Мануел Сантос се појавува како директор на две офшор компании на Барбадос. Тој претходно тврдеше дека ги прекинал врските со компаниите откако стана министер за финансии во владата во 2000 година.
Животниот стил на богатите и моќните
Не сите откритија во Рајските документи претставуваат нелегална активност. Но, тие фрлаат светлина врз светската елита, вклучително и луѓе како ко-основачот на Мајкрософт, Пол Ален. Вмешани се и други водечки светски компании како Епл, Мекдоналдс, Фејсбук и Волмарт.
Медицинската опрема на Мадона
Меѓу чудните инвестиции пронајдени во истражувањето на Рајските документи е и уделот на познатата пејачка Мадона во фирма за медицинска опрема. Актерката Кира Најтли, пак, имала удели во фирма за недвижности на британскиот остров Џерзи.