Гласањето на парламентарните избори во Северна Македонија започна, а први се изјаснуваат позитивните на Ковид-19 и оние во изолација. Во вторник ќе гласаат болните, изнемоштените и притворените, а в среда сите останати.
Фотографија: DW/P. Stojanovski
Патувачка гласачка кутија
Први гласаат граѓаните позитивни на Ковид-19 и оние кои се наоѓаат во изолација. Вкупно 706 лица се пријавиле во ДИК, а ги опслужуваат 54 избирачки одбори во кои има и медицински лица. Членовите на одборите одат во домовите на болните со посебни протоколи за заштита како што можете да видите и на фотографијата. Сите носат мантил, ракавици, заштитна маска, визир, очила и средство за дезинфекција.
Фотографија: DW/P. Stojanovski
Патот до гласачката кутија
Ширум државата в среда ќе бидат отворени 3.480 избирачки места, а право на глас имаат нешто над 1,8 милиони граѓани. Процедурата на гласањето овојпат во многу нешта ќе се разликува од вообичаената во „старата“ нормалност: контрола и задолжително носење маска, доколку е неопходно и чекање ред пред гласачкото место, а во самата просторија- посебен протокол- додека ливчето да стигне до кутијата.
Фотографија: DW/P. Stojanovski
Контрола пред гласање
Пред влезот на секое гласачко место ќе стојат полицајци чија главна задача е да обезбедат дека секој граѓанин влегува во просторијата со маска и го почитува протоколот. Влез без маска на устата и носот не е дозволен, и истата мора да се носи во текот на целиот процес, се до напуштањето на објектот.
Фотографија: DW/P. Stojanovski
Колку паравани- толку гласачи
По влегувањето во објектот, во зависност од околностите, можно е да треба да се причека пред влезот во гласачката просторија. Тоа е наложено со цел да се избегнуваат турканици на мал простор во собата за гласање. Во просториите ќе се пропуштаат онолку гласачи колку што има паравани за гласање.
Фотографија: DW/P. Stojanovski
Следете ја процедурата
Внатрешноста на просториите за гласање е одбележана со маркери за одржување дистанца. Таму следува традиционалната проверка со УВ лампа, предавање на личната карта од пропишаната дистанца, кусо симнување на маската заради идентификација, земање на гласачкото ливче и прскање со спреј на палецот.
Фотографија: DW/P. Stojanovski
Побезбедно од одење во маркет
Се што ви останува по земањето на гласачкото ливче е да го заокружите својот избор на него и да го уфрлите во гласачката кутија. На заминување не ја заборавајте својата лична карта и носете ја заштитната маска, најмалку, до напуштањето на објектот. Здравствените власти и епидемиолозите уверуваат дека гласањето ќе биде безбедно за сите и дека ризикот е помал одошто одење во маркет.
Пандемијата на коронавирусот го смени и вообичаениот тек на изборниот процес во Северна Македонија. За првпат се гласа во период од три дена, за првпат и среде недела, и тоа со посебни мерки за заштита како за граѓаните, така и за членовите на избирачките одбори. В среда, на 15 јули, гласањето ќе трае до 21 часот за да се избегнат турканици на гласачките места, и да им се остави на граѓаните повеќе простор и време слободно да ја изразат својата волја.
Еве како ќе изгледа гласањето согласно новите протоколи на здравствените власти.
