Белград и Приштина генерално задоволни од извештајот на Петерсен за Косово

Приштина со претпазливост реагираше на вчерашниот извештај на Петресен за Косово, иако медиумите во покраината му посветија големо значење на настанот во ОН. Официјален Белград, пак, искажа отворено задоволство во врска со рапортот на шефот на Унмик, затоа што во него била истакната потребата од децентрализација на Косово, како и состојбата на Србите во покраината. Според советникот на српскиот премиер, Слободан Самарџиќ, вчерашното излагање на Петерсен во ОН покажало дека меѓународната заедница не ги затвора очите пред потребите на српското население во Косово.

Од Приштина, пак, рапортот на шефот на Унмик го коментираше владината портпаролка Мимоѕа Кусари:

,, Извештајот на Сорен Јесен Петерсен беше на ниво, бидејќи тој многу реалноја опиша ситуацијата во покраината, од економската ситуација, која може да иницира социјална криза во покраината, прашањето околу децентрализацијата, враќањето на раселените лица, изборите на Косово како и составот на новата влада и постепеното пренесување на надлежностите врз институциите на покраината”, - рече Кусари.

По вчерашниот рапорт на Петерсен за Косово, според координаторот на српскиот форум за етнички односи, Душан Јаниќ, ќе стартуваат реформите во покраината.

,, Тоа е на дипломатски начин и со дипломатски речник кажано, минимална согласност кај меѓународните фактори во врска со Косово и решавањето на проблемите таму. Очигледно е дека по она што беше речено, ќе почне процес на реформирање на УНМИК, а исто така, беше ставено до знаење дека наредните неколку месеци ќе има сериозна работа во покраината, со цел да се постигнат бараните стандарди и да се верификуваат достигнувањата,, посочи за Дојче Веле Јаниќ.

Според американскиот експерт за Балканот, Даниел Сервер, Белград , Приштина и меѓународната заедница имаат различни пристапи за косовскиот проблем. Сервер смета дека ставовите на шефот на УНМИК се исправни и дека можат да доведат до преговори за конечен статус на покраината.