Барби полни 60 години
Таа е една од најпознатите жени на светот и своето време најчесто го поминува во детските соби. Во текот на својотт живот таа се адаптираше на сите промени на времето. Барби го слави 60. роденден.
Првата Барби
Сјајна руса коса, тенок струк, цврсти гради и долги нозе - вака на 9 март 1959 година светлото на денот го здогледа куклата Барби. Родена е во компанијата за играчки „Мател" и во следните години се вовлече во сите детски соби. Се разбира, и во Германија...
Невини спомени
Отсекогаш беше и Барби и девојчето кое сака коњи. Јас бев и двете, иако брат ми тоа го сметаше за нееманципирано и старомодно. Мојата соба беше претворена во светот на Барби. Полиците станаа спални соби за Кен, Барби, Тути и Тод. Брачната двојка и нивните деца. Барби беше модна икона, таа доби своја облека, специјално сошиена, плетена или на лепенка.
На Барби се’ и е дозволено
Барби и Кен до 1980-те беа двојката од соништата во детските соби. Со нив се учеше бакнување. Имаше оригинални и поевтини модели - на пример, Петра. Барби можеше да ги витка колената. Петра воопшто не изгледаше елегантно кога нејзините нозе при седнување стоеја круто. Барби беше иднината. Таа носеше градници, костими за капење, долна облека и високи потпетици.
Еманципирани и модерни
Некако световите на Барби и Петра не беа компатибилни. Облеката на Петра бргу се кинеше, косата не беше толку сјајна. Многу јасно - „Мател" остана лидер на пазарот. Неговите кукли станаа модерни и еманципирани по 1980-те. Оттогаш постои Барби - докторка, астронаут, пожарникар, менаџер или војник.
Притисокот за диверзитет
И Барби се’ повеќе беше изложена на притисок на политиката за идентитет. Во 2000. година моделот беше помалку направен за модните писти, а повеќе за совпаѓање со традиционалната жена од средна класа. Нејзината облека беше помалку гламурозна, а се’ повеќе инспирирана од секојдневна мода. Во 2016. „Мател" најави три различни „големини“ на куклата: голема, заоблена и ниска.
Во чекор со промените на времето
Кој ќе помислеше дека на почетокот на 2017 година, „Мател“ на пазарот ќе извади Барби со хиџаб?! Како модел беше земена американската спортистка Ибитихај Мухамад - првата жена која настапи на Олимпијадата во Рио со хиџаб. Со овој совршен маркетингшки потег Барби докажува дека е компатибилна со глобализираниот свет.
Африканско клише
Наскоро речиси и ќе нема професија или религија која Барби не ја практикувала, па така таа ја освои и Африка. Таа не е модерна градска жена од Најроби, туку со својата традиционална облека повеќе го потврдува клишето за црниот континент со недопрена природа и диви степи. Барби од Кенија е дел од колекцијата - „Кукли од целиот свет".
Феминистичка икона
Дури и со Барби како Фрида Кало (во средина) „Мател“ повторно постигна полн погодок. Внуката на мексиканската сликарка ја тужеше компанијата за прекршување на правото на интелектуална сопственост. Куклата беше повлечена од продажба.
Политички коректно
„Барби“ колекцијата никогаш нема да биде потполна. Сетот од 2019 година, и покрај тоа што ја има Барби во инвалидска количка и кукла со една нога протеза, делува речиси како пародија на денешницата. Сепак, на концернот за играчки му стана јасно дека веќе нема да може да поентира во детските соби само со синоока кукла со сјајна руса коса и тенок струк.