Балканската „осумка“ на состанок на Брдо кај Крањ

Осум претседатели од регионот на Западен Балкан, меѓу кои и претседателите на Србија и Косово, Томислав Николиќ и Атифете Јахјага, ќе се сретнат кон крајот на неделата на Брдо кај Крањ, на неформална конференција во рамките на иницијатавата Процес Брдо.
На состанокот најавен за 25. јули како гостин ќе учествува и францускиот претседател Франсоа Оланд.
Иницијативата за одржување на неформалната средба на лидерите на Западен Балкан и ЕУ заедно ја започнаа претседателите на Словенија Борут Пахор и на Хрватска Иво Јосиповиќ, со желба, како што е тогаш соопштено, да бидат промотери на натамошното проширување на ЕУ и добрососедски односи во регионот.
Првиот состанок на „осумката“ е одржан на 2. јули во Загреб, а лидерите на Западен Балкан тогаш се согласија иницијативата на неформални средби да се одржува еднаш годишно, со цел да се придонесе за поттикнување на помирувањето и соработката и решавање на отворените политички прашања.
Конференцијата во Брдо кај Крањ разбуди голем интерес кај медиумите особено од државите на Западен Балкан, но и од земјите членки на ЕУ.