EU na niyar ladabtar da Rasha kan Navalny

Majalisar dokoki ta Kungiyar Tarayyar Turai ta bukaci a kakaba wa Rasha takunkumi mai tsauri sakamakon sanya wa Alexei Navalny guba da ta yi da nufin murkushe dan adawan. Kudurin da majalisar ta amince da shi a birnin Bruxelles ya yi kira ga Tarayyar Turai da ta tsara jerin matakan takura wa Rasha tare da karfafa takunkumin da aka sanya mata bayan da ta mamaye yankin Kirimiya.

Tuni dai Moscow ta gargadi EU game da takunkumin, inda kakakin ma'aikatar harkokin wajen kasar ta Rasha Maria Zakharova ta ce "Duk wani yunkuri na sanya takunkumi da sunan Navalny wani mataki ne na fito na fito da Rasha."

Shi dai Navalny ya fadi ne a watan da ya gabata yayin da yake yakin neman zabe don marawa ‘yan takarar adawa baya a zabe yankuna. Amma a  yanzu haka yana jinya a Jamus, inda masana suka tabbatar da cewa an sanya masa guba ne a ruwan sha na kwalba.