Apollo 11: Tunawa da saukar farko a kan wata
Shekaru 50 ke nan da Neil Armstrong ya zama mutum na farko da ya sanya kafa kan duniyar wata. Gagarumin ci-gaba. Har yau yana kayatar da mu- musamman idan aka ga hotunan wancan lokaci.
"Karamin taku na "wani" mutum" (Yuli 20, 1969)
Daya daga cikin takun kafa a kan wata. Tafiya a doron wata, Neil Armstrong ya furta daya daga cikin kalamai da suka shahara: "Wannan shi ne karamin taku na "wani" mutum, babban tsalle ga dan Adam." Har yau ana tattaunawa yadda ya kirkiro da jimlar kalaman da kanshi, da ko watakila ya manta ya yi amfani da kalmar "wani" a ciki.
Yadda muka tafi (Yuli 16, 1969)
Za mu yi waiwaye: Daga dakin kula da tafiyar 'yan sama jannati na cibiyar Kennedy Space Flight Center (KSC), shugaban aikin Apollo, Samuel C. Phillips, na sanya ido kan ayyukan kafin kaddamarwa. Apollo 11, saukar farko kan wata, an kaddamar da shi a ranar 16 ga watan Yulin 1969 da kumbon Saturn V. A ciki akwai: Neil Armstrong, da Edwin "Buzz" Aldrin da kuma Michael Collins.
Talabijin na sararin samaniya (Yuli 16, 1969)
Wadannan mutane uku na daga cikin dubban mutane da suka kafa sansani a gabar tekuna da hanyoyi a kusa da cibiyar Kennedy Space Center, da ke zama dandalin Hukumar Binciken Sararin Samaniya ta Amirka, NASA, da ke a Florida, don ganin yadda za a kaddamar da Apollo. Mutane kimanin miliyan daya suka kai ziyara yankin don ganin abin tarihin.
Fitula, Kyamarori, shiri, tashi sama! (Yuli 16, 1969)
Ba dubban mutane masu sha'awa kadai suka kasance a wurin ba, dubban 'yan jarida ma sun ba da rahotannin yadda aka kaddamar da Apollo 11. A jimilce 'yan jarida 3497 aka yi wa rajista a hukumance, dukkansu kuwa sun hallara a yankin 'yan jarida na cibiyar Kennedy Space Flight Center (KSC). An harba kumbon a ranar 16 ga watan Yuli, 1969.
A kurkusa (Yuli 21, 1969)
Michael Collins ya dauki wannan hoto. Ana iya ganin kumbon zuwa kan wuta na Eagle yana dawowa daga duniyar wata. A bayansa watan ne da kanshi, a can gefensa kuma duniya ce. Yayin da Armstrong da Aldrin ke zama 'yan Adam na farko da suka sanya sahunsu kan wata, Collins ya tabbatar da matsayinsa a cibiyar Columbia Command Modul. Shi kadai ya zagaye wata tsawon sa'o'i 21.5.
Hada karfi da karfe (Yuli 20, 1969)
A wata sanarwa da Hukumar NASA ta bayar a 2009 Collins ya ce, "Ina jin kaina a cikin wani bangare na abin da ke faruwa doron wata. Na san cewa zan iya zama makaryaci ko sakarai idan na ce na samu mazauni mafi kyau a kumbon Apollo 11 a tsakanin 'yan sama jannatin uku, amma da gaskiya da karfin zuciya zan iya cewa na gamsu sosai da wadda na samu."
"Kumbon Eagle ya sauka!" amma... (July 20, 1969, 20:17:58 UTC)
A ranar 20 ga watan Yulin 1969 da karfe 20:17:58 UTC, Neil Armstrong ya aike da takaitaccen sako: "Eagle ya sauka!". Amma an dauki dan lokaci kafin mutanen biyu su sanya sahunsu kan wata. Da farko dole a shirya tafiyar dawowa doron kasa. A ranar 21 ga watan Yuli da karfe 2:56:20 UTC lokacin da ake jira ya iso: Neil Armstrong ya sanya kafarsa kan doron wata.
Samfuri mai lamba 10003 (Yuli 27, 1969)
Sa'o'i 2.5 na lokacin tone-tone a doron wata, Armstrong da Aldrin sun kwaso abubuwa masu nauyin fan 47 da suka zo da su doron kasa ta duniyar Earth. Wannan dan karamin dutse na daga ciki. Lokacin tafiye-tafiye sau shida na Apollo, an kwaso samfura 2415, masu nauyin kilogram 400. Ayyukan da aka tattara da bayanansu na a cikin kundin bayanai na "Lunar Sample and Photo Catalog".
Kayayyakin da aka bari don tarihi
Ba samfurin abubuwa kadai aka tattaro ba, amma har da wasu kayayyaki da aka barsu a can. A wannan hoton daya ne daga cikin kayayyakin da Neil Armstrong ya bari a kan wata. Ganyen zaitun din na zama alamar zaman lafiya. Amma akwai kwallaye na golf, da hoton iyali da kyamera da wasu aikace-aikace na Andy Warhol ko gashin tsuntsun. A dai yi hattari da bahayan 'yan sama jannatin.
Dawowa doron duniyar earth (Yuli 24, 1969, 4:50 na yamma agogon UTC)
'Yan sama jannatin sun sauka lafiya lau a tekun Pacific, a tazarar mil 812 kudu maso yammacin Hawaii da kuma tazarar mil 12 daga jirgin sojin ruwa na USS Hornet. Bayan saukarsu, 'yan sama jannatin sun cike takardun kwastam sun kuma ba da duwatsun na wata. Da aka musu tambaya game da lafiyarsu sai suka ce: "za a duba". An dauke su cikin wata tirela inda aka kebe su tsawon kwanak 21.
Shahararru ciki rigunan sama jannati (Satumba 23, 1969)
Hakika 'yan sama jannatin na Apollo 11 ba su saka rigunan sararin samaniya a nan ba, sai kayakin "sombreros" da "ponchos". Biki a Mexiko! Rangadin kwanaki 45 bayan tafiya sararin samaniya, ya kai 'yan sama jannatin kasashe 24 da birane 25. Amirka ta nuna a shirye take ta sanar da duniya iliminta na sararin samaniya. An yi wa 'yan sama jannatin gagarumar tarba kamar nan a birnin Mexico City.