„Zdrava odjeća“ mijenja modnu industriju

U to su se mogli uvjeriti posjetioci nedjelje mode u Berlinu, razgledajući odjeću proizvedenu u skladu sa svim ekološkim zahtijevima, i koja osvaja svjetske sajmove i modne revije. Doprinos industriji eko odjeće daju i poznate ličnosti od Evrope do SAD, koje se na crvenim tepisima sve češće pojavljuju u odjeći napravljenoj od bambusa ili organskog pamuka.

„Nezdrava majica“

Gereon Pilc van der Grinten od 2009. godine promoviše eko modu tokom nedjelje mode koja se u Berlinu organizuje svake godine u januaru i julu. On kaže da je Njemačka napredovala kad je riječ o marketingu eko odjeće, ali da u dizajnu zaostaje za Velikom Britanijom i Holandijom.

Oni koji se bave eko modom "žele da u potpunosti promijene modnu industriju, pošto ona nanosi ogromne štete", kaže van derGrinten, i podsjeća da modni giganti, osim što zapošljavaju djecu čija su radna mjesta izložena toksinima, koriste materijale koji su puni pesticida.

Dizajneri eko mode suočavaju se i sa ozbiljnim tržišnim problemima pošto je proizvodnja zdrave odjeće veoma skupa. Primjera radi, oni koji žele da kupe majicu napravljenu po svim kriterijumima eko mode, moraće za to zadovoljstvo izdvojiti 25 evra, umjesto pet, koliko košta "nezdrava majica". "Ako želite da živite zdravim životom i spasite svijet, to morate da platite" kaže van der Grinten.

Eko moda kao svjetski trend

Eko moda je u samom začetku, o čemu govori i podatak da eko hrana čini sedam procenata prehrambene industrije, dok "zdrava odjeća" čini samo tri procenata svjetske mode.

Za eko modu zainteresovane su i Sandra i Anja Uman iz Berlina. One su osnovale preduzeće Umasan gdje se proizvodi materijal napravljen do bambusa, eukaliptusa, sojine svile, koji pozitivno utiče na krvotok. Isto tako u Umasanu koriste i proizvode iz kozmetičke industrije, korisni za njegu kože. "Eko moda je svjetski trend. Ali, morate da razlikujete markentinški aspekt i stvarne namjere da se napravi ekološki proizvod" upozorava Sandra i dodaje da velike kompanije nerijetko lansiraju kao "eko-modele" odjeću koja ne ispunjava eko zahtjeve.

Autor: Melani Ševčenko / Una Sabljaković

Odgovorni urednik: Svetozar Savić