የኢሬቻ በዓል አከባበር በአዲስ አበባ

የኢሬቻ በዓል ዛሬ በአዲስ አበባ ለግምት የሚያስቸግር በርካታ ህዝብ በተገኘበት ተከብሯል። ከማለዳው ጀምሮ ለዚሁ ክብረ በዓል  ሲባል በተዘጋጀው አነስተኛ የተከተረ ውሃ ወይም ሆራ ፊንፊኔ በአባ ገዳዎች ምርቃትና የደስታ መልዕክት ተጀምሮ በድምቀት ሲከበር ነዉ የዋለዉ። ከተለያየ የኦሮሚያ አካባቢ የተሰባሰበ ቁጥሩ እጅግ የበዛ የበዓሉ እድምተኛ  ልዩ ልዩ የኦሮሞ ባህላዊ አልባሳትን በመልበስ፣ ኅብረት ዝማሬዎችን በማሰማትና በመጨፈር ስርዓተ በዓሉን በደስታ አክብሯል። በዚሁ በዓል ላይ የተለያዩ ብሔረሰብ ተወካዮችም በመታደም የሥነ ስርአቱ ድምቀት ሆነዋል። በአዲስ አበባ የኢሬቻ በዓል አከባበር በአማረ መልኩ መጠናቀቁ ተመለከተ። የከተማዉ አስተዳደር በአከባበሩ ላይ ሁሉ ለተሳተፉና ለዝግጅቱ መሳካት አስተዋፅኦ ላበረከቱ ምስጋናን አቅርቦአል። ትናንት አዲስ አበባ መስቀል አደባባይ የተካሄደዉ የኢሩቻ በዓል ዝግጅት ሥነ-ስርዓት በሰላም መጠናቀቁንም የከተማዉ ፖሊስ መሰጠዉ መግለጫ አስታዉቋል። በነገዉ እለትም  ኢሬቻ በሆራ ቢሾፍቶ ይከበራል።

 

ሰለሞን ሙጬ

አዜብ ታደሰ