የቻይና እና የአፍሪቃ ትብብር

የቻይና እና የአፍሪቃ ትብብር (FOCAC)  የላቀ እመርታ በማሳየት ላይ ነው ። የቻይና እና አፍሪቃ የትብብር ጉባኤ ትናንት ሲጠናቀቅ ቻይና  ለአፍሪቃ 51 ቢሊዮን ዶላር ድጋፍ መመደቧ ተሰምቷል ። እንደ ጎርጎሪዮስ አቆጣጠር በ2000 የተመሰረው የቻይና እና አፍሪቃ የትብብር መድረክ  ላይ የተሰማው የድጋፍ ዜና ለ1 ሚሊዮን ሰዎች የሥራ እድል ይፈጥራልም ተብሏል ። 

ከ50 በላይ የአፍሪቃ መሪዎች እና ተወካዮች የተገኙበት የሦስት ቀናቱ ጉባኤ ዐርብ ተጠናቋል ።  ጉባኤው የተጠናቀቀው በስኬት መሆኑ ተገልጧል ።  በእርግጥም ቻይና በጉባኤው ወቅት ከ30 ሃገራት ጋ አንድም ሥልታዊ ትብብር መስርታለች አለያም ትብብሩን ከፍ አድርጋለች ። የቻይና ውጭ ጉዳይ መሥሪያ ቤት ቃል አቀባዪት ማዎ ኒንግ ።

ቻይና በጉባኤው ወቅት ከ30 ሃገራት ጋ ሥልታዊ ትብብር አጠናክራለች

«ይህ ጉባኤ ቻይና እና አፍሪቃ በጋራ ለማደግ ቁርጠኛ ስለመሆናቸው ጠንካራ መልእክት አስተላልፏል ። ጉባኤው በደቡባዊ የዓለም ንፍቀ ክበብ  ያሉ ሃገራት ለአብሮነት እና ትብብር ያላቸውን ጽኑእ እምነት ያሳየ ነው ። ለሰው ልጅ የወደፊት የጋራ ተጠቃሚነት ያለው ማኅበረሰብ  በመገንባቱ ረገድ የደቡባዊ የዓለም ንፍቀ ክበብ  ሃገራት ሚናን አጉልቶ ዐሳይቷል ።»

ቻይና እና አፍሪቃ በጋራ ዘመናዊነትን ለማፋጠን ስድስት ዋና ዋና ሐሳቦችን ይፋ አድርገዋል ። ትብብራቸውንም ወደ ላቀ ደረጃ ከፍ ለማድረግ የሚያስችል ዕቅድም ነድፈዋል ። ጉባኤው የቤጂንግ ስምምነት እና የድርጊት መርኃ ግብር አጽድቋል። የቻይና ፕሬዝዳንት ሺ ቺንፒንግ በሚቀጥሉት ሦስት ዓመታት ከአፍሪቃ ጋ ዘመናዊነትን በጋራ ለማራመድ 10 የትብብር የድርጊት መርኃ ግብሮችን ይፋ ማድረጋቸውንም ቃል አቀባዩዋ ዐሳውቀዋል ።

የአፍሪቃ እና ቻይና ትብብር ከፍ ብሏል

የቻይና ከፍተኛ ባለሥልጣናት ከተለያዩ የአፍሪቃ ሃገራት መሪዎች ጋ በጉባኤው ወቅት በቅርበት ለመነጋገር መቻላቸው ተዘግቧል ። የቻይና ጠቅላይ ሚንሥትር ሊ ሺያንግ ከኢትዮጵያ ጠቅላይ ሚንሥትር ዐቢይ አህመድ ጋ ቤጂንግ ውስጥ ሐሙስ ዕለት ፊት ለፊት ተገናኝተው ተነጋግረዋል ።

ቻይና  ከኢትዮጵያ ጋር በመተባበር ፖለቲካዊ የእርስ በርስ መተማመንን ለማጠናከር፣ ሁለንተናዊ ወዳጅነትን ለማጎልበት እንደምትሠራ የቻይናው ጠቅላይ ሚንሥትር ተናግረዋል ። ብሎም በሁለቱ ሀገራት መካከል ያለውን ሁለንተናዊ ትብብር ለማስፋት እና ከኢትዮጵያ ጋር በሁለትዮሽ ግንኙነት ላይ የላቀ እድገት ለማስመዝገብ እንደምትገፋበትም አክለዋል ሲል አሶሺየትድ ፕሬስ አትቷል ።

ማንተጋፍቶት ስለሺ

እሸቴ በቀለ