የበዓል ግብይት በአዲስ አበባ

በዚሁ የገበያ ስፍራ በሬ፣ ፍየልና ዶሮን ጨምሮ በርከት ያሉ በጎች ለሽያጭ ቀርበዋል። ይሁንና ግብይቱ ከእስከዛሬው የተቀዛቀዘ መሆኑን ሻጮችም ገዥዎችም ተናግረዋል። በተለይ የበግ እና ፍየል ሽያጭ ላይ የዋጋ ጭማሪ መስተዋሉንና በአንጻሩ የበሬ እና ዶሮ ዋጋ በመጠኑም ቢሆን ቅናሽ እንዳለው የአዲስ አበባው ዘጋቢ ሰለሞን ሙጬ ያነጋገራቸው ሸማቾች ገልጸዋል። የግብይት ሂደቱ ግን የኮሮና ተኅዋሲ ከአንዱ ወደ ሌላው ለመተላለፍ አመቺ በሆነና በሚያጋልጥ ፣ የተሰጡ መመሪያዎች ሁሉ ችላ በተባሉበት አኳኋን ሲከናወን ተመልክተናል። ከቅዳሜ ረፋዱ ጀምሮ በአዲስ አበባ በተለያዩ አካባቢዎች ተዘዋውረን ባደረግነው የበዓል ዋዜማ ግብይት ትልልቅ የህንጻ የገበያ ማዕከላት ጭር ብለዋል።በድምጽ ማጉያ ይታገዙ የነበሩ የግብይት ጥሪዎች የሉም። የሰው ውር ውርም በእጅጉ ቀንሷል።

በ እርድ እንስሳት ይሞሉ የነበሩ ዋና ዋና መንገዶች ክፍት ሆነው ተስተውለዋል። በአጠቃላይ ግን በኮሮና ተህዋሲ ስጋት እና ይህንንም ተከትሎ መረርሽኙን ለመከላከል በወጡ የመንግሥት ከልካይ መመሪያ እና ደንቦች የተነሳ በከተማዋ የ2012 ዓም የትንሳኤ በዓል ግብይት ተቀዛቅዞ ተስተውሏል።
ሰለሞን ሙጩ 
ልደት አበበ