በሶስት ክልሎች በጎርፍ መጥለቅለቅ ጉዳት ደረሰ

በኢትዮጵያ ከወትሮ ለየት ባለ መልኩ ጠንክሮ የሰነበተው የክረምቱ ዝናብ በተለያዩ ክልሎች የጎርፍ መጥለቅለቅ አስከትሏል። ሰሞኑን በኦሮሚያ ፣ አማራ እና አፋር ክልሎች የወንዞች ሙላትን ተከትሎ በተፈጠረ የጎርፍ መጥለቅለቅ በርካቶች ከመኖርያ ከቄዬአቸው ተፈናቅለዋል፤ በንብረት ላይም ጉዳት መድረሱ ተነግሯል። በኦሮሚያ ክልል በምዕራብ ሸዋ ዞን ኤጄሬ ወረዳ ፣ ደቡብ ምዕራብ ሸዋ ዞን ዳዋ ኢሉ ወረዳ ፣ ምስራቅ ሸዋ ዞን ሊበን ወረዳ፣ አዳማ ፣ ከፊል ፈንታሌ ወረዳ፣ እንዲሁም የመተሃራ እና የመርቲ ከተሞች ጉዳት የደረሰባቸው ናቸው። በአፋር ክልል የአፋምቦ፣ ድብቲ እና አሳኢታ ከተሞች እና አካባቢያቸው የጎርፍ መጥለቅለቅ የደረሰባቸው አካባቢዎች ናቸው። በአማራ ክልልም በተመሳሳይ ለተከታታይ ሳማንታት በጣለ ዝናብ የጎርፍ መጥለቅለቅ እና የመሬት መንሸራተት አስከትሏል። ኢንሳሮ እና አንኮበር በተባሉ አካባቢዎች አምስት ሰዎች በጎርፍ ተወስደው ሕይወታቸው አልፏል። በዚህም በሰሜን ሸዋ ዞን ከ8,000 ሄክታር በላይ የእርሻ ማሳ ላይ ጉዳት ሲደርስ  ከ57,000 የሚልቁ አርሶ አደሮች የጉዳቱ ሰለባዎች ሆነዋል። በተጨማሪም 700 የመኖርያ ቤቶች መውደማቸውን እና ከ4500 በላይ ሰዎች በዚሁ ምክክንያት መፈናቀላቸውን የባልደረባችን አለምነው መኮንን ዘገባ ያመለክታል። 

ታምራት ዲንሳ

አለምነው መኮንን

ስዩም ጌቱ

ነጋሽ መሀመድ