የ2015 አበይት ክንዉኖች

የኢትዮጵያዉያኑ 2015 ዓመት፣ የሠላም ጥሪ ደምቆ የተሰማበት፣ የሰላም ድርድር አግባቢ ዉጤት- ክሽፈትም የታየበት፣ጦርነት ቆሞ ጦርነት የተጫረበት፣ አንድ የነበሩ መስተዳድሮች የተከፋፈሉበት የኃይማኖት መሪዎች ተጣልተዉ የታረቁበት-የተለያዩበትም ዓመት ነዉ።በጦርነት፣ግጭት የሞተ-የተፈናቀለዉ ተቆጥሮ ሳያበቃ በነባርና አዳዲስ ግጭቶች ሌሎች የሞቱ-የተፈናቀሉበት፣ ፖለቲከኞች የተገደሉበት፣ ኢትዮጵያ የብሪክስ አባል የመሆንዋ በጎ መሰል ዜና በሸቀጥ ዋጋ ንረት የታጠፈበት፣የፀጥታ መናጋት፣ ድርቅና ረሐብ የሚሊዮኖችን መከራ ያጠናበት ዓመትም ነዉ። የቀድሞ ባልደረባዬ ዘዉዱ ታደሰ ዘመን-ዘመንን ሲተካ ቀሪዉ ታሪክ ነዉ-እንዳለዉ ሆኖ 2015 በነበር የሚዘከርበትን የጎሉ ጉዳዮችን ባጭጭሩ ጠቃቅሰን እንሰናበታዉ።ላፍታ አብራችሁኝ ቆዩ።