በፈገግታ የታጀበው የኢትዮጵያ እና ኤርትራ መሪዎች ግንኙነት

ለሁለት አስርት አመታት ገደማ በባላንጣነት ይተያዩ የነበሩት የኢትዮጵያ እና የኤርትራ መሪዎች ሲተቃቀፉ ታዩ። ፕሬዝዳንት ኢሳያስ አፈወርቂ በአስመራ አውሮፕላን ማረፊያ ጠቅላይ ምኒስትር አብይ አሕመድን ሲቀበሉ ፈገግታ እና ሳቅ ጭፈራም ይታይ ነበር። በእርግጥ በድንበር ይገባኛል ውዝግብ ከቀሰቀሰው ጦርነት በኋላ ለረዥም አመታት በአይነ ቁራኛ ሲተያዩ ለቆዩት ኢትዮጵያ እና ኤርትራ ሐምሌ 1 ቀን 2010 ዓ.ም. ታሪካዊ ቀን ሆኗል።

የኤርትራው ማስታወቂያ ምኒስትር የማነ ገብረ መስቀል በግል የትዊተር ገፃቸው "እውነተኛ ታሪካዊ ጊዜ"ብለውታል። የኢትዮጵያ አየር መንገድ በአስመራ ሲደርስ ከ20 አመታት በኋላ ለመጀመሪያ ጊዜ መሆኑን የማስታወቂያ ምኒስትሩ ገልጸዋል።

ሁለቱ መሪዎች በአስመራ ጎዳናዎች በአጀብ ሲጓዙ ታይተዋል። ግራና ቀኝ የፕሬዝዳንት ኢሳያስ አፈወርቂ እና የጠቅላይ ምኒስትር አብይ አሕመድ ምስሎች የታተሙባቸው ቲ ሸርቶች የለበሱ ኤርትራውያን ነበሩ።

የኢትዮጵያ ልዑካን ቡድንን ለመቀበል በርካታ ኤርትራውያን አደባባይ ወጥተዋል። በአስመራ ጎዳናዎች የኢትዮጵያ እና የኤርትራ ሰንደቅ ዓላማዎች ጎን ለጎን ተውለብልበዋል።