عالمی شہرت یافتہ چیک ادیب میلان کنڈیرا انتقال کر گئے

کنڈیرا کی موت کی فرانس میں ان کے پبلشر اور چیک میڈیا دونوں نے بدھ 12 جولائی کے روز تصدیق کر دی۔ ان کا انتقال منگل 11 جولائی کو ہوا۔

کنڈیرا کی مشہور ترین تصنیفات میں ان کا ناول 'وجود کی ناقابل برداشت لطافت‘ بھی شامل ہے، جو اس منظر نامے کے ساتھ شروع ہوتا ہے کہ 1968ء میں پراگ میں سوویت یونین کے ٹینک داخل ہو رہے ہوتے ہیں۔ وہی پراگ جہاں میلان کنڈیرا رہتے تھے اور جہاں سے وہ 1975ء میں فرانس منتقل ہو گئے تھے۔

امسالہ بکر پرائز سری لنکا کے ادیب شیہان کرونا تیلاکا کے نام

اس پس منظر میں اور اپنے دور کے سیاسی حالات و واقعات کا گہرے ذاتی انہماک سے مشاہدہ کرنے والے میلان کنڈیرا کے ادبی موضوعات میں محبت اور جلاوطنی سے لے کر سیاست اور ذاتی تجربات تک سب کچھ شامل ہے اور بڑی شدت سے۔

ماضی میں کنڈیرا چیکوسلوواکیہ کے شہری تھے مگر 1989ء میں آنے والے مخملیں انقلاب کے نتیجے میں جب کمیونسٹوں کو اقتدار سے باہر کر دیا گیا، تو کنڈیرا کا وطن تقسیم ہو کر اپنے لیے ایک نیا نام اپنا چکا تھا: چیک جمہوریہ۔ مگر تب تک کنڈیرا اپنے لیے جلاوطنی کی زندگی میں ایک نیا آغاز کر چکے تھے۔

عہد حاضر کے معروف ترین ہسپانوی ادیب ماریاس انتقال کر گئے

ایک نئی زندگی، ایک نیا وطن اور ایک نئی شناخت جس کا محور فرانسیسی دارالحکومت پیرس میں ان کا فلیٹ تھا اور جہاں سے انہوں نے اپنا ادبی تخلیقی سفر جاری رکھا۔ اس عرصے میں کنڈیرا نے چیک زبان کے بجائے فرانسیسی میں لکھنا شروع کر دیا تھا۔

فرانس میں جلاوطنی کی زندگی شروع کرنے کے بعد جب یورپ میں مشرق اور مغرب کو تقسیم کرنے والا آہنی پردہ ختم بھی ہو گیا، تو بھی وہ شاذ و نادر ہی چیک جمہوریہ گئے تھے۔

جرمن ادب کا باخ مان پرائز سلووینیہ کی مصنفہ آنا مروان کے نام

کنڈیرا کے 1984ء میں شائع ہونے والے ناول 'وجو دکی ناقابل برداشت لطافت‘ کی خاص بات یہ ہے کہ اس کا ان کی بہت سی دیگر ادبی تخلیقات اور تصنیفات کی طرح دنیا کی کئی زبانوں میں ترجمہ ہو چکا ہے اور 1988ء میں اس پر ایک بہت مشہور فلم بھی بنائی گئی تھی، مگر خود چیک جمہوریہ میں یہ ناول 2006ء تک کبھی شائع نہیں ہوا تھا، حالانکہ چیک زبان میں یہ ناول دستیاب تو 1985ء سے تھا۔

کنڈیرا کا انتقال ان کے گھر پر ہوا

چیک نژاد فرانسیسی ادیب میلان کنڈیرا کی موت کی تصدیق موجودہ چیک جمہوریہ کے شہر اور ان کی جائے پیدائش برنو میں میلان کنڈیر لائبریری کی طرف سے بھی کر دی گئی۔ اس لائبریری کی ترجمان آنا مرازوا نے بدھ 12 جولائی کے روز بتایا، ''میں انتہائی افسوس کے ساتھ یہ اعلان کرتی ہوں کہ میلان کنڈیرا کل منگل (11 جولائی) کے دن طویل علالت کے بعد پیرس میں اپنے گھر پر انتقال کر گئے۔‘‘

عالمی شہرت یافتہ جنوبی افریقی ادیب ولبر اسمتھ انتقال کر گئے

بین الاقوامی سطح پر ایک ناول نگار، شاعر، اور مضمون نگار کے طور پر شہرت حاصل کرنے والے کنڈیرا یکم اپریل 1929ء کو موجودہ چیک جمہوریہ کے دوسرے سب سے بڑے شہر برنو میں پیدا ہوئے تھے اور انہوں نے تعلیم پراگ میں حاصل کی تھی۔

1975ء میں اس دور کی کمیونسٹ ریاست چیکوسلوواکیہ سے رخصت ہو کر فرانس میں آباد ہو جانے والے کنڈیرا نے اپنی زندگی کے آخری تقریباﹰ 48 برس فرانس ہی میں گزارے، جو ان کی عمر کا تقریباﹰ نصف حصہ بنتا ہے۔

کنڈیرا نے اپنے ادبی سفر میں جو شہرت حاصل کی، اس کا آغاز 'دا جوک‘ یا 'مذاق‘ نامی اس ناول سے ہوا تھا، جو 1967ء میں شائع ہوا تھا اور جس کا مرکزی کردار ایک ایسا نوجوان ہے، جس کو ایک معصوم سا مذاق کرنے پر کمیونسٹ پارٹی اور یونیورسٹی دونوں سے نکال دیا جاتا ہے۔

ادب کا نوبل انعام تنزانیہ کے ادیب عبدالرزاق گورنا کے نام

کنڈیرا کے بارے میں سرکردہ بین الاقوامی ادبی نقاد یہ کہتے رہے تھے کہ وہ ادب کے نوبل انعام کے حق دار تھے اور انہیں یہ اعزاز دیا جانا چاہیے تھا، تاہم انہیں یہ اعزاز حاصل نہ ہو سکا۔

میلان کنڈیرا نے، جنہیں ایک بار ان کی چیک شہریت سے محروم بھی کر دیا گیا تھا، 1981ء میں فرانسیسی شہریت اختیار کر لی تھی۔ 2019ء میں انہیں ان کی چیک شہریت بھی لوٹا دی گئی تھی۔

م م/ا ب ا (اے ایف پی، اے پی)