د آلمان د زرغون ګوند مشر: پر چین باید د آلمان تکیه کمه شي
۱۴۰۱ مرداد ۸, شنبه
امید نوري پور چې د آلمان د زرغون ګوند یو له مشرانو څخه دی، وایي چې چین نسبت روسیې ته د نړۍ د دیموکراسۍ له پاره یو له تر ټولو سترو سیستماتیکو رقیبانو څخه دی.
نوموړي د شنبې په ورځ د آلمان د بایرن رسنیزې ډلې سره په یوه ځانګړې مرکه کې وویل چې چین په روانه پيړۍ کې د لویدیځ له پاره یو له سترو جیو ستراتیژیکو ننګونو څخه دی.
امید نوري پور وویل: «له دې امله مونږ باید د همکارۍ له ټولو پوتنشیلونو څخه استفاده وکړو، ځکه د بیلګي په توګه مونږ نه شو کولی له چین پرته چاپيریال وژغورو. له بل اړخه مونږ باید بی له دې چې اړیکې پرې کړو، په چټکۍ سره د چین پورې خپلې وابستګۍ راکمې کړو.»
د زرغون ګوند دغه غړی غواړي چې د چینایي درملو د انحصار په برخه کې د پام وړ کمښت رامنځته شي. نوري پور د درملو د محصولاتو په برخه کې د اروپایي اومه موادو پر ستراتیژۍ د تمرکز زیاتولو غوښتنه کوي.
هغه وویل: «په اروپا کې د درملو ۶۸ سلنه خام مواد په مستقیم یا غیر مستقیم ډول له چین څخه واردیږي. دغه ستونزه د کرونا ویروس وبا خپریدو له پیلیدو سره راڅرګند شوه. خو تر اوسه پورې په دې برخه کې هیڅ کار نه دی شوی چې دغه وابستګي له منځه یوړل شي. دا د اورلګیدنې د خطر په څیر دی».
آژانسونه: ش.ن/ ا.خ.ح