Православните христијани го слават Велигден

Во Македонија, најмасовно беше кај Соборниот храм во Скопје, каде литургијата ја предводеше поглаварот на Македонската Православна Црква г.г. Стефан.

Во велигденската порака до верниците поглаварот г.г. Стефан испрати апел за мир, единство и сплотеност меѓу македонскиот народ и меѓу сите верници.

„Повикуваме на единство меѓу нашиот народ, трудејќи се да го запазиме единството на Духот преку врските на мирот. Здобивајќи се со тој дар, ќе можеме мудро и незлобно да одговориме на сите предизвици што катадневно се испречуваат пред нас. Да го чуваме сопственото и да го почитуваме достоинството на другите, да се грижиме за доброто на секого и на сите околу нас“, порача Стефан.

Илјадници христијани го прославија воскресението Христово во Црквата на светиот гроб во Ерусалим. Светиот оган се смета за чудо кое се случува секоја година на Велика Сабота. Православниот патријарх на Ерусалим, Теофилос III ги пали првите свеќи со светиот оган, а потоа им ги распределува на верниците во црквата. Оганот потоа се пренесува и на верниците кои чекаат надвор од црквата.

Неколку илјади луѓе присуствуваа на Велигденската миса во Црквата Христос Спасителот во Москва, која ја следеа и рускиот претседател и премиер, Владимир Путин и Дмитри Медведев. Мисата ја водеше рускиот патријарх Кирил.

Поглаварот на египетската Коптска црква, Папата Тавадрос II ја предвоеше мисата во Каиро. Таа се одржа во Катедралата Св. Марко, најважното светилиште за коптските христијани. По мисата верниците се молеа за мир и безбедност во Египет и во регионот.

Светиот оган од Ерусалим пристигна во Србија со авион. Во Белград го прими српскиот патријарх Иринеј кој го запали првиот сноп од 33 свеќи- кои ја симболизираат секоја година од животот на Христос, а потоа му ги предаде на претседателот Томислав Николиќ.