Селото Бабино- дом на најмалата библиотека во светот

На девет километри од Демир Хисар, на два километри лево од магистралниот пат Сапотница- Демир Хисар, во пазувите на Плакенска планина се протега туристичко-рекреативниот центар Бабино, кое, покрај со својот природен зелен рај, е надалеку познато и по најмалата библиотека не само во Македонија, туку и во светот, позната како „Алби“. 

Нејзиниот сопственик Стево Степаноски вели дека во неговата библиотека првите книги биле донесени во далечната 1882 година и тоа од Багдад, Техеран, Дамаск, Истанбул, Анкара, а се печатени на персиски, старотурски, арапски јазик. 

„Мојот прадедо Јован кој бил со нагласени културни потреби и секогаш бил понапред пред своето време знаејќи ја бесценетата вредност на пишаниот збор честопати откупувал книги од оние војници кои во недостаток на пари од државната каси биле исплаќани со книги наместо со пари‘‘,  вели Степановски.

Бесплатен пасош од татковината на книгата 

Во фондот на библиотеката има преку 20 илјади наслови на старословенски, турско-отомански, пишани и вредни документи, книги, текстови, ракописи. 

„Во фондот на библиотеката се чуваат и ракописи и документи од особено значење за НОВ и Илинденското востание, изданија печатени до крајот на 1946 година, изданија од делата на видни југословенски писатели и многу старопечатени изданија‘‘, раскажува сопственикот на библиотеката. 

Книгите ги набавува со откуп, често му ги подаруваат институции и поединци и писатели кои ја посетуваат библиотеката и се мотивираат да остават дел од своето творештво на библиотеката. Но книги се набавуваат и буквално во запуштени и отфрлени места.

„Најповеќе доаѓам и до буништата на Бит Пазар и под Калето, луѓе ми се јавуваат знаејќи ја нашата страст за книгите, па често не упатуваат каде да бараме некоја ретка книга‘‘. 

Степаноски вели дека неговата библиотека е јавен сервис на книги на граѓаните на Демир Хисар, но и пошироко, а книгите се издаваат како и во другите библиотеки. Но поради тоа што нема постојано вработени во библиотеката тие во зимниот период работат на повик, а во текот на летото кога има најмногу посетители, библиотеката работи нон стоп, во што е ангажирано целото семејство Стапаноски. Во библиотеката има 3500 членови, а членството е бесплатно, за што добивате специјален пасош за членство во татковината на книгата. 

Најбарани книгите за историјата на македонскиот народ 

Членовите на библиотеката се од разни возрасти од Македонија и од цел свет, но сепак предначат луѓе со нагласени културни потреби појаснува за Дојче Веле Стево Степаноски и додава:

„Во мојата библиотека членуваат сите македонски академици, а има членови и од странство од Упсала центрите. Кај нас доаѓаат во библиотеката да ги користат моите книги верувале или не дури од Монтевидео, од Уругвај, од Аргентина‘‘. 

За тоа како издаваат книги, потенцира дека ретките книги и друга литература е пожелно да се разгледуваат во самата библиотека поради тоа што се уникатни, а досега со позајмувањето книги имале и лоши искуства. 

„За жал имаме едно лошо искуство, бидејќи кај нас има книги коишто се ретки и често истите не се враќаат во фондот на библиотеката и затоа во последно време се определивме истите да се користат внатре во фондот на библиотеката‘‘, раскажува Степановски. 

Тој вели дека најбарани се книгите и документите од историјата на македонскиот народ, но и за црквите и манастирите: „Многу се барани и речниците. Во фондот има околу 350 речници на различни светски јазици. Голем интерес пројавуваат за документи за историјата на македонскиот народ, а имаме доста документи за македонскиот народ во британските, француските, австриските, руските, српските документи за историјата на македонскиот народ. Голем интерес пројавуваат за црквите и манастирите за кои исто така имаме доста вредни документи‘‘.

Автор: Антоанела Димитриевска